महाराष्ट्रातील सत्ता संघर्षाच्या सुनावणीला सुप्रीम कोर्टामध्ये काही क्षणात सुरवात होणार आहे. CJI DY चंद्रचूड यांच्या नेतृत्वाखालील घटनापीठ हा निकाल देणार आहे. हा निकाल वाचण्यापूर्वी माजी चीफ जस्टीस अहमदी यांच्या निधनामुळे शोक सभा आयोजित करण्यात आली आहे. या शोकसभेनंतर महाराष्ट्राच्या सत्तासंघर्षावर निकाल देण्यात येणार आहे. पण हे माजी चीफ जस्टीस अहमदी कोण? त्यांच्याविषयी जाणून घेऊयात.

अजीज मुशब्बर अहमदी हे भारताचे २६ वे मुख्य न्यायाधीश होते. गुजरात उच्च न्यायालयात न्यायाधीश म्हणून कामकाज पाहिल्यानंतर त्यांची १९८८ मध्ये सर्वोच्च न्यायालयात न्यायाधीश म्हणून नियुक्ती करण्यात आली होती. त्यानंतर त्यांची पदोन्नती करून १९९४ रोजी त्यांची देशाच्या मुख्य न्यायाधीशपदी नियुक्त करण्यात आली होती. १९९४ ते १९९७ दरम्यान त्यांनी मुख्य न्यायाधीश म्हणून काम केले. तर २ मार्च २०२३ रोजी त्यांचे निधन झाले.

दरम्यान, सुरतेतील दाऊदी बोहरा कुटुंबात त्यांचा जन्म झाला होता. ते आधी मुंबई प्रांताचे रहिवाशी होते, त्यांच्या वकिलीलाही मुंबईमधूनच सुरूवात झाली. कायद्याची पदवी प्राप्त केल्यानंतर अहमदी यांनी मुंबईमधूनच १९५४ मध्ये आपल्या वकिली कारकिर्दीला सुरूवात केली होती. पण गुजरात राज्याच्या स्थापनेनंतर ते गुजरातमध्ये राहायला गेले.

त्यांना १९६४ मध्ये अहमदाबाद जिल्हा व सत्र न्यायालयात न्यायाधीश म्हणून नियुक्त करण्यात आले. त्यानंतर १९७६ मध्ये त्यांची गुजरात उच्च न्यायालयात न्यायाधीश म्हणून नियक्ती करण्यात आली. गुजरात उच्च न्यायालयाचे मुख्य न्यायाधीश म्हणून त्यांनी अनेक कामं केली होती.

१९९७ मध्ये त्यांनी सेवानिवृत्त झाल्यामुळे आपले पद सोडले होते. त्यानंतर ते अलीगढ मुस्लीम विद्यापीठाचे कुलगुरू बनले. त्यानंतर २००७ साली पुन्हा त्यांना अलीगढ विद्यापीठाचे कुलगुरू म्हणून नियुक्त करण्यात आले. शिक्षण क्षेत्रात प्रवेश केल्यानंतर त्यांना जागतिक विद्यापीठांमध्ये बोलण्यासाठी अनेकदा आमंत्रित करण्यात आले होते.

आज सुप्रीम कोर्टात माजी मुख्य न्यायाधीश अहमदी यांच्या निधनाच्या शोकसभेमुळे महाराष्ट्राच्या सत्तासंघर्षावरील सुनावणीला जवळपास एक तास उशीर होत आहे. ही शोकसभा तब्बल ४० ते ४५ मिनीटे चालणार असून त्यानंतर सत्तासंघर्षाच्या सुनावणीला सुरूवात होणार आहे.