सोलापूर : शासनाच्या तिजोरीत शिक्षकांच्या पगारासाठी पुरेसे पैसे नसल्याची वस्तुस्थिती समोर आली आहे. सोलापूर जिल्हा परिषदेच्या २७९५ शाळांवर नऊ हजार शिक्षक असून त्यांच्या वेतनासाठी दरमहा ७४ कोटी रुपये लागतात. परंतु, आता दरमहा ४५ ते ४७ कोटींचाच निधी येत आहे. त्यामुळे जिल्हा परिषदेच्या शाळांवरील शिक्षकांचे वेतन एक तारखेला नव्हे तर १० ते २५ तारखेपर्यंत होऊ लागले आहे.

मार्च २०२० रोजी राज्यात कोरोनाचा शिरकाव झाल्यानंतर पुढील दोन वर्षे शासकीय कर्मचाऱ्यांच्या वेतनासाठी सरकारला वेळप्रसंगी कर्ज काढावे लागले. आता कोरोनाची स्थिती सावरली असून साडेतीन ते चार लाख कोटींच्या महसुली उत्पन्नाचे राज्याचे उद्दिष्ट आहे. राज्याच्या तिजोरीत दरमहा सरासरी २० हजार कोटींचा महसूल जमा होत आहे.

पण, राज्य सरकारच्या तिजोरीतील एक लाख ६० हजार कोटी रुपये शासकीय कर्मचाऱ्यांच्या वेतनावर खर्च होतो. त्यात सर्वाधिक शिक्षक-शिक्षकेतर कर्मचाऱ्यांच्या वेतनावरील खर्च आहे. आता माध्यमिक शाळा, खासगी प्राथमिक शाळा, उच्च महाविद्यालयांमधील शिक्षक-शिक्षकेतर कर्मचाऱ्यांना वेतन दरमहा वेळेवर दिले जात आहे. परंतू, जिल्हा परिषदेच्या शाळांवरील शिक्षकांना वेतन वेळेत मिळत नाही. आता काहींनी आंदोलनाचाही इशारा दिला आहे.

वेतनासाठी निधी कमी येत असल्याने जिल्ह्यातील ११ तालुक्यातील सात तालुक्यातील शिक्षकांचे पहिल्या टप्प्यात तर पुढील टप्प्यात उर्वरित तालुक्यातील शिक्षकांचे वेतन केले जात आहे. पहिल्या टप्प्यातील वेतन १० तारखेपर्यंत तर दुसऱ्या टप्प्यातील शिक्षकांचे वेतन २५ तारेखपर्यंत करावे लागत आहे.

‘१ तारखेला वेतन’ची अंमलबजावणी नाहीच

माध्यमिक, प्राथमिक शिक्षकांचे वेतन दर महिन्याच्या १ तारखेला व्हावे, असा शासन निर्णय आहे. शिक्षकांनी काढलेले होम लोन, पर्सनल लोन, वाहनावरील कर्जाचे दरमहा १ ते ५ तारखेपर्यंत हप्ते असतात. बॅंकांमधील त्यांचे ‘सिबिल’ खराब होऊ नये म्हणून त्यांना १ तारखेला वेतन मिळावे, अशी अपेक्षा असते. तरीपण, वर्षातून तीन-चार महिने वगळता अन्य महिन्यांमध्ये त्यांचे वेतन ५ तारखेच्या पुढेच होते ही वस्तुस्थिती आहे. जिल्ह्यातील १५ हजार माध्यमिक शिक्षक-शिक्षकेतर कर्मचाऱ्यांसाठी दरमहा ८५ कोटी रुपये वेळेत येतात. त्यांचे वेतन वेळेतच होते, अशी माहिती वेतन अधीक्षक प्रकाश मिश्रा यांनी दिली.

निधीच्या उपलब्धतेनुसार वेतनाचे नियोजन

जिल्हा परिषदेच्या शाळांमधील शिक्षकांच्या वेतनासाठी दरमहा सुमारे ७४ कोटी रुपये लागतात. पण, काही महिने निधी थोडा कमी पडत असल्याने त्यानुसार नियोजन करून वेतन दिले जात आहे.

- संजय जावीर, प्राथमिक शिक्षणाधिकारी, सोलापूर

झेडपी शाळा, शिक्षकांची स्थिती

• एकूण शाळा

• २,७९५

• शिक्षकांची संख्या

• ९,१६०

• वेतनासाठी दरमहा रक्कम

• ७४ कोटी

• शासनाकडून मिळणारी रक्कम

• ४५ कोटी