JD Majethia News: 'साराभाई व्हर्सेस साराभाई' या आयकॉनिक आणि कल्ट क्लासिक शोच्या निर्मितीसाठी ओळखले जाणारे अभिनेते जेडी मजेठिया यांना पितृशोक झालाय. त्यांचे वडील नागरदासभाई मजेठिया यांचे आज निधन झाले. मिळालेल्या माहितीनुसार, त्यांनी आज सकाळी अखेरचा श्वास घेतला, त्यामुळे मजेठिया कुटुंब शोकसागरात बुडालंय.

टेली टॉक इंडियाच्या वृत्तानुसार, जेडी मजेठिया यांचे वडील नागरदासभाई मजेठिया हे गेल्या अनेक महिन्यांपासून वयाशी संबंधित आजारांने ग्रस्त होते. आज 25 डिसेंबर रोजी सायंकाळी 4.30 वाजता मुंबईतील कांदिवली (पश्चिम) येथील डहाणूकर वाडी स्मशानभूमीत त्यांच्यावर अंत्यसंस्कार करण्यात येणार आहेत.

वडिलांच्या आकस्मिक निधनाने जे.डी. मजेठिया आणि परिवाराचे न भरुन येणारे नुकसान झाले आहे. आपल्या वडिलांसोबतचा आनंदी फोटो शेअर करताना जे.डी.मजेठिया लिहितात, “माझा सर्वात प्रिय माणूस, कायम असाच राहा. माझे सर्वात प्रिय व्यक्ती, माझे वडील नागरदास मजिठिया, 25/12/23 यांचं निधन झालं. आम्हा सर्वांना सोडून ते अनंताच्या प्रवासाला निघून गेले."

अभिनेते आणि निर्माते जेडी मजेठिया गुजराती मनोरंजन विश्वातील त्यांच्या कामांसाठी प्रसिद्ध आहेत. त्यांनी हिंदी नाटके, एकांकिका आणि चित्रपटांमध्ये केलेल्या कामांसाठी चांगली ओळखही मिळवली आहे. 'साराभाई व्हर्सेस साराभाई' आणि 'खिचडी' हे दोन क्लासिक टेलिव्हिजन शो त्यांनी दिले आहेत.

अभिनेता म्हणून जेडी मजेठिया 'करिश्मा का करिश्मा', 'बा, बहू और बेबी' आणि इतर अनेक मालिकांमध्ये दिसले. विशेष म्हणजे जे.डी. मजेठिया गुजराती थिएटरमध्ये गेली २० वर्ष सक्रिय आहेत. त्यांनी अलीकडेच 'खिचडी 2: मिशन पांथुकिस्तान'मध्ये हिमांशू सेठची भूमिका केली.

शिवाय, त्यांनी खिचडी 2 या चित्रपटाच्या प्रमोशनसाठी बिग बॉस 17 मध्ये इतर कलाकारांसह आपली उपस्थिती देखील दर्शविली. अनेक कलाकारांनी जे.डी.मडेठिया यांचं पितृछत्र हरपल्याबद्दल त्यांच्या वडिलांना श्रद्धांजली वाहिली आहे.