Ayodhya Ram Temple consecration ceremony on January 22: श्री रामजन्मभूमी मंदिराचा अभिषेक सोहळा 22 जानेवारीला अयोध्येत संपन्न होणार आहे. या खास सोहळ्याकडे सगळ्या देशाचे लक्ष लागले आहे. राम मंदिर प्राणप्रतिष्ठा सोहळ्याच्या तयारीलाही वेग आला आहे. तर आता कार्यक्रमाला येणाऱ्या पाहुण्यांनाही निमंत्रण पाठवण्यात येत आहे.

यात केवळ राजकिय आणि सामजिक क्षेत्रातीलच नाही मनोरंजन विश्वातील कलाकारांना देखील आमंत्रित करण्यात येत आहे. आता बॉलीवूड अभिनेता रणबीर कपूर आणि आलिया भट्ट यांना देखील या कार्यक्रमात सहभागी होण्यासाठी आमंत्रित करण्यात आलं आहे. आलिया आणि रणबीरला राष्ट्रीय स्वयंसेवक संघाच्या सदस्यांनी निमंत्रण दिले आहे.

रजनीकांत, प्रभास, कंगना रणौत, माधुरी दीक्षित, अनुपम खेर, सनी देओल, अजय देवगण, आयुष्मान खुराना, मधुर भांडारकर, संजय लीला भन्साळी या खास कलाकारांना अयोध्येत येण्याचे आमंत्रण मिळाले आहे. आता या यादीत रणबीर कपूर आणि आलिया भट्ट यांचे नाव देखील जोडले गेले आहे.

रणबीर कपूर आणि आलिया भट्ट यांना या सोहळ्याचे खास आमंत्रण मिळाले आहे. सध्या आलिया अन् रणबीरचे फोटो सोशल मिडियावर व्हायरल होत आहेत. या फोटोत दोघेही निमंत्रण पत्रिका हातात घेऊन हसताना दिसत आहेत.

आरएसएसचे अखिल भारतीय प्रचार प्रमुख सुनील आंबेकर, आरएसएस कोकणचे प्रांतीय प्रचार प्रमुख अजय मुडपे आणि निर्माता महावीर जैन यांनी आलिया आणि रणबीरला श्री रामजन्मभूमी मंदिर प्राण प्रतिष्ठा सोहळ्यासाठी आमंत्रित केले आहे.