'पवित्र रिश्ता' या मालिकेतील मानव-अर्चना ही जोडी आजही प्रेक्षकांच्या मनात घर करून आहे. या भूमिका साकारताना सुशांत सिंह राजपूत आणि अंकिता लोखंडे खरोखर एकमेकांच्या प्रेमात पडले. जवळपास सहा वर्षे हे दोघं एकमेकांना डेट करत होते. तर अडीच वर्षे दोघं सोबत एकाच घरात राहत होते. २०१६ मध्ये या दोघांचं ब्रेकअप झालं. मात्र त्यानंतरही अंकिताच्या घरात सुशांतचे फोटो तसेच होते. ब्रेकअपनंतरही तिने हे फोटो का काढले नाहीत, असा प्रश्न तिच्या मित्रमैत्रिणींनी अनेकदा तिला विचारला होता. यामागचं कारण तिने नुकत्याच दिलेल्या एका मुलाखतीत सांगितलं. "अनेकांनी मला त्याचे फोटो काढून टाकण्याचा सल्ला दिला होता. पण मला माझा वेळ हवा होता. आम्ही अडीच वर्षे सोबत राहिलो होतो. त्याच्या आठवणींपासून मुक्त होणं इतकं सोपं नव्हतं", असं ती 'बॉलिवूड बबल'ला दिलेल्या मुलाखतीत म्हणाली. 

ब्रेकअपच्या दु:खातून सावरण्यासाठी प्रत्येकाला थोडा वेळ लागतोच. स्वत:ला हा वेळ देता यावा यासाठी तिने सुशांतचे फोटो काढून टाकले नव्हते. "परिस्थितीपासून पळ काढणाऱ्यांपैकी मी नाही. भविष्यात जरी सुशांत कधी माझ्यासमोर आला तरी मी त्याचा सामना मी करू शकेन यासाठी मी स्वत:ला सावरत होते. त्याचे फोटो ठेवण्यामागे माझा हा विचार होता. जेव्हा मी त्या त्रासातून बाहेर आले, तेव्हा मी त्याचे फोटो काढून टाकण्याचा निर्णय घेतला. एक जागा रिकामी असेल तरच तिथे दुसरी गोष्ट ठेवू शकू, असा मी विचार केला. त्यावेळी माझ्या आयुष्यात विकी आला आणि आता तोच माझं सर्वस्व आहे. मी त्याच्यासोबत खूप खूश  आहे", असं ती पुढे म्हणाली. 

हेही वाचा : "सुशांतसोबत लग्न करण्यासाठी मी मोठे चित्रपट नाकारले"; अंकिताला खुलासा

जून २०२० मध्ये सुशांतचं अकस्मात निधन झालं. त्याच्या मृत्यू प्रकरणाचा तपास सध्या सीबीआय करत आहे. अंकितानंतर सुशांतचं नाव अभिनेत्री रिया चक्रवर्तीसोबत जोडलं गेलं. सुशांतच्या मृत्यूप्रकरणी रियाचीही चौकशी करण्यात आली.