मुंबई : ड्रग्ज प्रकरणात क्लीन चिट मिळालेला बॉलिवूड सुपरस्टार शाहरुख खानचा मुलगा आर्यन खान (Aryan Khan) याने एनसीबी (NCB) समोर गांजा सेवन केल्याची कबुली दिली होती. आर्यनने एनसीबीला म्हणजेच नार्कोटिक्स कंट्रोल ब्युरोला सांगितले होते की, त्याने अमेरिकेत ग्रॅज्युएशनच्या काळात 'गांजा'चे सेवन केले आहे. एजन्सीने दाखल केलेल्या आरोपपत्रानुसार आर्यन झोपेच्या विकाराने त्रस्त होता. गेल्या ऑक्टोबरमध्ये क्रूझ जहाजावर छापा टाकून ड्रग्ज जप्त केल्याप्रकरणी अटक करण्यात आलेल्या २० पैकी १४ जणांविरुद्ध एनसीबीने शुक्रवारी मुंबई न्यायालयात आरोपपत्र दाखल केले.

या दरम्यान पुराव्याअभावी आर्यन खानसह सहा जणांची नावे नसल्याचे केंद्रीय एजन्सीने म्हटले आहे. आरोपपत्रानुसार, एनसीबीसमोर दिलेल्या एका निवेदनात आर्यनने कबूल केले की, त्याने 2018 मध्ये अमेरिकेत ग्रॅज्युएट होत असताना गांजा ओढायला सुरुवात केली होती. तपासादरम्यान, आर्यनने एजन्सीला सांगितले की त्या दिवसात त्याला "झोपेची काही समस्या होती आणि त्याने काही इंटरनेट लेखांमध्ये वाचले की यात गांजा उपयुक्त आहे". एनसीबीने म्हटले आहे की, आर्यन खानने दुसर्‍या एका निवेदनात कबूल केले की, त्याच्या मोबाइल फोनमध्ये सापडलेले व्हॉट्सअॅप ड्रग चॅट त्याने केले होते.

त्याने एजन्सीला असेही सांगितले की, तो वांद्रे येथील एका डीलरला ओळखतो, परंतु त्याला त्याचे नाव किंवा नेमके ठिकाण माहित नाही कारण मुख्यतः तो (डीलर) त्याच्या मित्राला ओळखतो, ज्याला या प्रकरणात सहआरोपी करण्यात आले आहे. एनसीबीने क्रूझवरील ड्रग्ज प्रकरणात आर्यन खानला क्लीन चिट दिली होती, असे म्हटले होते की त्याच्याकडून ड्रग्ज जप्त करण्यात आलेले नाहीत किंवा इतर आरोपींसह तो त्यात सामील होता हे सिद्ध करण्यासाठी कोणतेही ठोस पुरावे नाहीत. आर्यन आणि अरबाज ए मर्चंटच्या वक्तव्यावरून असे दिसून आले आहे की, मर्चंटने त्याच्या कोणत्याही वक्तव्यात असा दावा केलेला नाही की, त्याच्या ताब्यातून जप्त केलेली सहा ग्रॅम चरस आर्यन खानची होती.

आर्यन खाननेही त्याच्या विधानांमध्ये कधीही हे मान्य केले नाही की, त्याला जप्त केलेली चरस सेवन त्यालाच करायचे होते. एनसीबीने म्हटले आहे की, "खरं तर, अरबाजने ६ ऑक्टोबर २०२१ रोजीच्या त्याच्या निवेदनात म्हटले आहे की, त्याला आर्यन खानने क्रूझवर कोणतेही अंमली पदार्थ न ठेवण्याची चेतावणी दिली होती." तसेच, आर्यन खानचा मोबाईल फोन औपचारिकपणे जप्त करण्यात आला नव्हता आणि त्याच्या फोनवरून मिळालेल्या चॅट त्याला सध्याच्या प्रकरणाशी संबंध असल्याचे सिध्द करत नाही.

त्यामुळे त्यांच्याविरुद्ध कोणतीही तक्रार दाखल करण्यात आलेली नाही. आरोपपत्रात म्हटले आहे की, तपास एजन्सीसमोर दिलेल्या एका निवेदनात आर्यन खानने कबूल केले की तो अमेरिकेतील लॉस एंजेलिसमध्ये असताना त्याने गांजाचे सेवन केले होते. अमली पदार्थांच्या खरेदीसाठी त्याने आणखी एका आरोपी अचितसोबत व्हॉट्सअॅप चॅट केल्याची कबुलीही दिली होती. आर्यन खानने अभिनेत्री अनन्या पांडेसोबत ड्रग्ज खरेदीबाबत संभाषण केल्याची कबुली दिली आणि ते मेसेज आयफोनच्या आय-मेसेज फीचरद्वारे पाठवले गेले.