Baby bring it on: 'जाऊ द्या ना बाळासाहेब' (Jaundya Na Balasaheb) हा गिरीश कुलकर्णी (Girish Kulkarni) यांचा चित्रपट 2016 मध्ये रिलीज झाला. या सिनेमातील सर्वच गाणी प्रेक्षकांना आवडली. डॉल्बी वाल्या, वाट दिसू दे, बेबी ब्रिंग इट ऑन या 'जाऊ द्या ना बाळासाहेब' या सिनेमातील गाण्यांनी प्रेक्षकांची विशेष पसंती मिळवली. यामधील डॉल्बी वाल्या आणि ब्रिंग इट ऑन ही दोन गाणी तर प्रत्येक कार्यक्रमात लावली जातात. आता यामधील बेबी ब्रिंग इट ऑन या गाण्याचे हिंदी व्हर्जन प्रेक्षकांच्या भेटीला आलं आहे. पण या हिंदी व्हर्जनला काही नेटकरी ट्रोल करत आहेत.

'बेबी ब्रिंग इट ऑन' चं हिंदी व्हर्जन झालं रिलीज

'बेबी ब्रिंग इट ऑन' या गाण्याचे हिंदी व्हर्जन हे मडगाव एक्सप्रेस या सिनेमात वापरण्यात आलं आहे. मडगाव एक्सप्रेस हा सिनेमा 22 मार्च रोजी प्रेक्षकांच्या भेटीला येणार आहे. सिनेमा रिलीज होण्यापूर्वीच यामधील 'बेबी ब्रिंग इट ऑन' हे गाणं रिलीज करण्यात आलं आहे. या गाण्याला अजय-अतुल यांनी संगीत दिलं आहे, तर यामध्ये नोरा फतेही, दिव्येंदु, अविनाश यांनी डान्स केला आहे. तसेच मराठी अभिनेता उपेंद्र लिमये आणि अभिनेत्री छाया कदम यांची झलक देखील गाण्यात दिसते.

गाण्याला नेटकऱ्यांनी केलं ट्रोल

'बेबी ब्रिंग इट ऑन' या गाण्याच्या हिंदी व्हर्जनला नेटकऱ्यांनी ट्रोल केलं आहे. एका नेटकऱ्यानं गाण्याला कमेंट केली, "चांगल्या गाण्याची वाट लावली" तर दुसऱ्या युझरनं कमेंट केली, "कायपण म्हणा मराठी गाण्याची सर या गाण्याला नाही"

'बेबी ब्रिंग इट ऑन' या गाण्याला देखील अजय-अतुल यांनीच संगीत दिलं होतं. तसेच या गाण्यात सई ताम्हणकर, गिरीश कुलकर्णी, भाऊ कदम हे कलाकार दिसले. हे गाणे अजय-अतुल यांनी लिहिलं होतं, तर या गाण्याच्या हिंदी व्हर्जनचे गीतकार कुमार हे आहेत.

'मडगाव एक्सप्रेस' ची स्टार कास्ट

मडगाव एक्सप्रेस या चित्रपटात दिव्येंदू, प्रतीक गांधी, अविनाश तिवारी, नोरा फतेही, उपेंद्र लिमये आणि छाया कदम या कलाकारांनी प्रमुख भूमिका साकारली आहे. प्रेक्षक या चित्रपटाची उत्सुकतेने वाट बघत आहेत. या सिनेमाचं दिग्दर्शन कुणाल खेमूनं केलं आहे.