Bigg Boss Marathi 4 : 'बिग बॉस मराठी' (Bigg Boss Marathi)च्या चौथ्या पर्वातून चौथा सदस्य काल घराबाहेर पडला. गेली काही दिवस कोणत्याच वादात किंवा चर्चेत नसणाऱ्या त्रिशूल मराठेला काल निरोपाचा नारळ देण्यात आला.

त्रिशूल मराठे हा घरात कॉमन मॅन म्हणून आला होता. सामान्य प्रेक्षकांचे प्रतिनिधित्व करणारा एक व्यक्ती यंदा बिग बॉस च्या घरात असणार असे सांगण्यात आले होते. त्यानुसार त्रिशूलची एंट्री झाली. सुरवातीला त्रिशूल चांगला खेळला. पण नंतर मात्र त्याच्याकडून फारसे मनोरंजन झाले नाही आणि अखेर पाच आठवड्यांनी त्याने बिग बॉसच्या घरातून निरोप घेतला. कालच्या भगत त्रिशूल घरा बाहेर पडताना दिसला.

त्याला निरोप देताना मांजरेकर म्हणाले, 'एका चांगल्या माणसाला घराबाहेर जावं लागत आहे. तुझ्यासारखा लकी प्रेक्षक बिग बॉसच्या घराचा सदस्य झाला याचा मला आनंद झाला होता.' त्रिशूल मराठे सामान्य प्रेक्षक म्हणून सहभागी झाला असला तरी आता मात्र तो सेलिब्रिटी झाला आहे. त्रिशूलला अभिनयाची आवड असल्याचे त्याने या शो मध्ये बोलून दाखवले आहे, त्यामुळे आता त्रिशूलच्या आयुष्यात काय बदल घडतोय का, त्याला मालिका, सिनेमांसाठी विचारणा होतेय का ही लवकरच कळेल.

एअरटेल लकी कॉलरच्या माध्यमातून त्रिशूल मराठे बिग बॉसच्या चौथ्या पर्वात सहभागी झाला होता. बिग बॉसच्या पहिल्या आठवड्यात मांजरेकरांचं मन जिंकणारा त्रिशूल दुसऱ्या आठवड्यापासूनच घरात दिसेनासा झाला होता. त्याचा खेळही ढेपळला शिवाय तो कोणत्याच विषयावर आपले मत मांडत नव्हता. याबाबत त्याला चावडीवर मांजरेकरांनी कल्पनाही दिली होती. परंतु त्यांच्या खेळात सुधारणा झाली नसल्याने त्याला निरोप देण्यात आला.