‘टाइमपास’ या चित्रपटाद्वारे रातोरात स्टार झालेल्या प्रथमेश परबने हिंदी चित्रपटातही काम केले. निशिकांत कामत यांच्या ‘दृश्यम’ या चित्रपटातील त्याचे खूप कौतुक झाले. मराठी व हिंदी चित्रपट आणि नाटकातही त्याने काम केले. एका सर्वसामान्य कुटुंबातून तो या इंडस्ट्रीत आला आणि मोठा झाला आहे. त्याला ‘सेलिब्रेटी वीकएण्ड’ ही संकल्पना खूप आवडली.

ताज्या बातम्यांसाठी डाऊनलोड करा ई-सकाळचे ऍप

तो म्हणाला, ‘सध्या लॉकडाऊन आहे आणि मी घरी चित्रपट व वेबसीरीज पाहात आहे. परंतु तरीही वीकएण्डबद्दल सांगायचे, तर दर शनिवारी संध्याकाळी आम्ही मित्रमंडळी एकत्र जमतो आणि विलेपार्ले किंवा अंधेरी येथील टर्फ क्लबमध्ये नाईट क्रिकेट खेळतो. मला क्रिकेट व फुटबॉलची खूप आवड आहे. त्यामुळे चित्रीकरण नसले, की आम्ही मित्रमंडळी हमखास हे खेळ खेळतो. मात्र शनिवारी चित्रीकरण असल्यास क्रिकेट खेळता येत नाही, तेव्हा आम्ही भरलेले पैसे वाया जातात. असो. त्याचे एवढे टेन्शन आम्ही घेत नाही. शनिवारी रात्री उशिरा आलो, की सहाजिकच रविवारी सकाळी उठायला उशीर होतो. रविवारी सकाळी कुणाच्या भेटीगाठी घेत नाही. मात्र संध्याकाळी मित्रमंडळी भेटल्यावर फिरायला जाणे किंवा चित्रपट पाहणे होतेच. कारण माझ्या बहुतेक मित्रांना शनिवार आणि रविवार सुट्टी असते. घरच्या मंडळींबरोबर कधी मॉल वगैरे ठिकाणी गेलो नाही, पण मित्रांबरोबर खरेदी आणि फिरणे होते. विलेपार्ले येथे अन्नपूर्णी नावाचे एक हॉटेल आहे, तेथे सॅण्डविच चांगले मिळते. आम्ही मित्रमंडळी तेथे जातो आणि खातो. माझी नाटकातील मित्रमंडळी भेटल्यावर नाटक आणि सिनेमा या गोष्टींवर चर्चा होते.

पुण्याच्या बातम्या वाचण्यासाठी येथे ► क्लिक करा

आमच्या मित्रमंडळींमध्ये थट्टामस्करी खूप चालते. राज ठाकरे यांच्या भाषणावर आमची चर्चा होते. मग साहजिकच राजकारणाचा विषय चर्चिला जातो. कधी कधी माझे फॅन्स रविवारी संध्याकाळी मला भेटायला चक्क घरीही येतात. माझा एक फॅन नाशिकहून आला होता भेटायला. त्याने ‘टाइमपास’ चित्रपट पाहिलेला होता आणि त्या चित्रपटाचे चित्रीकरण जेथे जेथे झाले तेथे तेथे जाऊन त्याने फोटो काढलेले होते. कामावरून सुट्टी घेऊन ठाणे वगैरे ठिकाणी जाऊन त्याने ते फोटो काढलेले होते. ते फोटो पाहून मीदेखील अवाक् झालो. कारण त्याने चित्रपटाची लोकेशन्स कशी आणि कुठून मिळविली, असा मला प्रश्‍न पडला...नाशिकहून कामावरून सुट्टी घेऊन तो येथे आला आणि त्याने फोटो काढले. तो माझा फॅन मला येऊन भेटला...खरोखरच त्या फॅन्सचे कौतुक करावे तेवढे थोडेच आहे...’