हिजाब(Hijab) वरुन सुरु असलेला वाद आता राज्या-राज्यात पेटून उठला आहे. थेट कोर्टात आता हे प्रकरण गेलं आहे. 'हिजाब' संदर्भात सर्वसामान्यांपासून सेलिब्रिटींपर्यंत सर्वचजणं व्यक्त होताना आपण पाहत आहोत. अनेक सेलिब्रिटींनी तर हिजाबचं समर्थन करीत बॉलीवूडला रामराम करण्याची घोषणा केली आहे. याच हिजाब प्रकरणावरुन आता आणखी एका कन्नड अभिनेत्याला अटक झाल्याची बातमी येत आहे. कन्नड अभिनेता चेतन कुमार अहिंसा याला हिजाब प्रकरणावर कोर्टात सुनावणी करणाऱ्या न्यायाधीशांविरोधात ट्वीट केल्यामुळे ही अटक झाली आहे.

सेंट्रल डिव्हिजनचे पोलिस उपायुक्त एमएन अनुचेथ यांनी यासंदर्भात स्पष्टिकरण देताना सांगितलं आहे की,''कन्नड अभिनेता चेतन कुमार याला मंगळवारी २२ फेब्रुवारी,२०२२ रोजी बंगळुरु शहरातील पोलिसांनी ही अटक केली आहे. त्याच्या विरोधात आईपीसी की ५०५(२) आणि ५०४ कलम अंतर्गत तक्रार करण्यात आली आहे''. चेतन कुमारने केलेल्या ट्वीटच्या आधारावर त्याच्याविरोधात शेषाद्रिपुरम येथे तक्रार नोंदवण्यात आली होती.

चेतनला अटक करण्याच्या एक दिवस आधी त्याची पत्नी मेघानं आरोप केला होता की,'' काही पोलिस अधिकारी आले आणि त्याला घेऊन गेले. पण तेव्हापासून तो गायब आहे''. सोशल मीडिया प्लॅटफॉर्मच्या माध्यामातून लाइव्ह येऊन तिनं सांगितलं की,''कोणतंही अटक वॉरंट न आणता पोलिस चेतनला सोबत घेऊन गेले. तेव्हापासून माझा त्याच्याशी काहीच संपर्क नाही. हे एक प्रकारचं अपहरण आहे. चेतनचा फोनही बंद लागत आहे,त्याच्या सुरक्षारक्षकाचा फोनही बंद येतोय. मी शेषाद्रिपुरम पोलिस स्टेशनमध्ये चौकशीसाठी गेले तेव्हा कळालं की तो त्या पोलिस ठाण्यात आलाच नाही. त्याला चौकशीसाठी कुठेतरी दुसरीकडे नेण्यात आलं आहे. त्याला गायब करण्यात आलंय. पण का?''