आपल्या वेगळेपणासाठी नेहमीच चोखंदळ प्रेक्षक, अभ्यासक, जाणकार यांच्यासाठी पर्वणी असणाऱ्या पुणे आंतरराष्ट्रीय़ पुरस्काराची आज सांगता झाली आहे. यंदाच्या पिफमध्ये मराठी चित्रपटानं सर्वांचे लक्ष वेधून घेतले आहे. त्यामध्ये ‘बारा बाय बारा’ या मराठी चित्रपटाला यावेळच्या प्रभात सर्वोत्कृष्ठ चित्रपटानं गौरविण्यात आले आहे. दोन वर्षांच्या कालावधीनंतर पार पडलेल्या पिफला पुणेकरांचा प्रचंड प्रतिसाद मिळाला आहे. मराठी चित्रपट हे यंदाच्या महोत्सवाचे वेगळेपण म्हणता येईल.

पुणे फिल्म फाउंडेशन आणि महाराष्ट्र शासन यांच्या संयुक्त विद्यमाने आयोजित १९ व्या पुणे आंतरराष्ट्रीय चित्रपट महोत्सवात यावर्षीचा प्रभात सर्वोत्कृष्ट आंतरराष्ट्रीय चित्रपट दिग्दर्शक पुरस्कार ‘बारा बाय बारा’ या भारतीय चित्रपटाचा दिग्दर्शक गौरव मदान याने पटकावला. रोख रूपये पाच लाख, मानचिन्ह व मानपत्र असे या पुरस्काराचे स्वरूप होते. या वेळी डॉ. जब्बार पटेल, गौरव मदान आणि राज्याचे वैद्यकीय शिक्षण व सांस्कृतिक कार्यमंत्री अमित देशमुख उपस्थित होते.

महोत्सवात मकरंद माने दिग्दर्शित ‘पोरगा मजेतंय’ या चित्रपटाने ‘संत तुकाराम सर्वोत्तम आंतरराष्ट्रीय मराठी चित्रपट’ पुरस्कारावर आपली मोहोर उमटविली. यावेळी महाराष्ट्र शासनाच्या वतीने रोख रूपये पाच लाख, मानचिन्ह व मानपत्र देऊन चित्रपटाच्या चमूला गौरविण्यात आले.