Sakal Premier Award 2023 : मराठी-हिंदी मनोरंजनसृष्टीतील तारे-तारकांची मांदियाळी, नृत्याचा बहुरंगी आविष्कार, जोडीला विनोदाची झणझणीत फोडणी आणि खुमासदार सूत्रसंचालन अशा दिमाखदार वातावरणात बुधवारी (ता. १२) ठाण्यातील डॉ. काशिनाथ घाणेकर नाट्यगृहात सायंकाळी ६ वाजता ‘सकाळ प्रीमियर पुरस्कार सोहळा’ रंगणार आहे.

मुख्यमंत्री एकनाथ शिंदे, सांस्कृतिक कार्यमंत्री सुधीर मुनगंटीवार, खासदार डॉ. श्रीकांत शिंदे आदींसह राजकीय, सामाजिक आणि मनोरंजन क्षेत्रातील अनेक नामवंत मंडळी या सोहळ्यास उपस्थित राहणार आहेत. पीएनजी ज्वेलर्स लि. या सोहळ्याचे मुख्य प्रायोजक आहेत.

मुंबई आणि पुण्यात अनुक्रमे पहिला व दुसरा ‘सकाळ प्रीमियर पुरस्कार सोहळा’ दिमाखात पार पडला होता. आता तिसरा प्रीमियर पुरस्कार सोहळा बुधवारी आयोजित करण्यात आला आहे. पूजा सावंत, मानसी नाईक, नेहा महाजन, रोहित शिवलकर, अमिता कुलकर्णी, स्वामिनी वाडकर आणि पुष्कर जोग हे कलाकार दमदार नृत्याविष्कारांनी सोहळ्याची रंगत वाढवणार आहेत.

अभिनेते संजय मोने चटकदार विनोदांनी प्रेक्षकांना खळखळून हसवण्यासाठी सज्ज झाले आहेत. अभिनेत्री मृण्मयी देशपांडे आणि अभिनेता पुष्कर श्रोत्री सोहळ्याचे सूत्रसंचालन करणार आहेत. यंदाच्या सोहळ्यात एकापेक्षा एक सरस विविध चित्रपटांमध्ये चुरस पाहायला मिळणार आहे.

या सोहळ्यात सर्वोत्कृष्ट चित्रपट, सर्वोत्कृष्ट दिग्दर्शक, सर्वोत्कृष्ट अभिनेत्री, सर्वोत्कृष्ट अभिनेता, सर्वोत्कृष्ट कथा, सर्वोत्कृष्ट पटकथा, सर्वोत्कृष्ट गीतकार आणि सर्वोत्कृष्ट संकलक इत्यादी पुरस्कारांबरोबरच काही मान्यवरांचा विशेष गौरव करण्यात येणार आहे. सध्या सर्वत्रच ‘सकाळ प्रीमियर पुरस्कार सोहळ्या’ची चर्चा रंगू लागली असून सर्वांचीच उत्सुकता शिगेला पोहोचली आहे.

विजेत्यांबाबत उत्सुकता

वाळवी, मी वसंतराव, चंद्रमुखी, गोष्ट एका पैठणीची, सरसेनापती हंबीरराव, बालभारती आणि धर्मवीर चित्रपटांमध्ये प्रीमियर पुरस्कारासाठी मोठी चुरस आहे. स्वप्नील जोशी, जितेंद्र जोशी, प्रसाद ओक, प्रवीण तरडे, अजय पुरकर आणि ललित प्रभाकर यांच्यात सर्वोत्कृष्ट अभिनेत्यासाठी स्पर्धा होणार आहे.

सई ताम्हणकर, अमृता खानविलकर, सायली संजीव, मुक्ता बर्वे, जिनिलिया देशमुख आणि पूर्वा पवार यांची नावे सर्वोत्कृष्ट अभिनेत्रीसाठीच्या पुरस्कारांच्या स्पर्धेत आहेत. सर्वोत्कृष्ट दिग्दर्शकासाठी प्रवीण तरडे, परेश मोकाशी, शंतनू रोडे, निपुण धर्माधिकारी आणि अजित वाडीकर यांची नावे आघाडीवर आहेत.