'दंगल' या चित्रपटात दमदार भूमिका साकारत अभिनेत्री सान्या मल्होत्रा Sanya Malhotra हिने बॉलिवूडमध्ये स्वत:ची वेगळी ओळख निर्माण केली. सान्याने त्यानंतर इतरही काही चित्रपटांमधून आपल्या अभिनयकौशल्यची चुणूक दाखवली. सान्याच्या खासगी आयुष्याविषयी चाहत्यांना फार कमी माहित आहे. नुकत्याच दिलेल्या एका मुलाखतीत ती पहिल्यांदाच तिच्या रिलेशनशिप आणि ब्रेकअपविषयी व्यक्त झाली. गेल्या वर्षी लाँग डिस्टन्स रिलेशनशिपमध्ये असल्याचा खुलासा सान्याने केला आणि त्याचसोबत ब्रेकअप का झालं, तेसुद्धा तिने सांगितलं.

'ब्राइट्स टुडे'ला दिलेल्या मुलाखतीत सान्या म्हणाली, "ब्रेकअपमुळे मी फार खचले होते. मी दिल्लीत राहत असताना त्या मुलाला डेट करू लागले. चार वर्षे आम्ही रिलेशनशिपमध्ये होतो. ब्रेकअपनंतर लॉकडाउन सुरू झाला आणि मी मुंबईत एकटी राहू लागले. या एकटेपणात मी स्वत:विषयी आणि रिलेशनशिपविषयी खूप विचार करू लागले. मला माझ्या स्वभावातही बदल आणावं लागेल, असं वाटू लागलं."

"माझं रिलेशनशिप परफेक्ट होतं. मिनाक्षी सुंदरेश्वर या माझ्या चित्रपटातही लाँग डिस्टन्स रिलेशनशिपचा विषय होता. म्हणून मी माझ्या मुलाखतींमध्ये त्याच्याविषयी बोलणार होते. त्यासाठी त्याने परवानगीसुद्धा दिली होती. कारण पहिल्यांदाच मी असं सर्वांसमोर माझ्या रिलेशनशिपबद्दल बोलणार होते. माझ्या मते, लाँग डिस्टन्समुळेच आमचं नातं फार काळ टिकलं नाही", असं ती पुढे म्हणाली.

सान्या मुंबईत एकटी राहत असल्याने तिला अशी एखादी व्यक्ती हवी होती जिच्यासोबत ती राहू शकेल आणि चांगला वेळ घालवू शकेल, जे तिच्या लांबच्या नातेसंबंधात शक्य नव्हतं. यावर्षी सान्याचे दोन चित्रपट ओटीटी प्लॅटफॉर्मवर प्रदर्शित झाले. 'पगलाइट' आणि 'मीनाक्षी सुंदरेश्वर' या चित्रपटांमध्ये तिने दमदार भूमिका साकारल्या. ती लवकरच 'लव्ह हॉस्टेल', 'हिट' या चित्रपटांमधून प्रेक्षकांच्या भेटीला येणार आहे.