प्रसिद्ध टेलिव्हिजन अभिनेता शाहीर शेखचे (Shaheer Sheikh) वडील कोरोनाशी झुंज देत आहेत. त्यांची प्रकृती गंभीर असून त्यांना व्हेंटिलेटरवर ठेवण्यात आलं आहे. शाहीरने ट्विट करत याबद्दलची माहिती दिली. 'माझे बाबा व्हेंटिलेटरवर आहेत. कोरोनाशी ते झुंज देत आहेत. त्यांच्या प्रकृतीसाठी प्रार्थना करा', असं ट्विट शाहीरने केलं. शाहीरच्या या ट्विटवर अनेक नेटकरी आणि त्याच्या सहकलाकारांनी कमेंट्स करत त्याच्या वडिलांसाठी प्रार्थना केल्या. (Covid 19)

'संयम ठेव मित्रा, ते लवकरच बरे होऊन घरी परततील', असं अभिनेत्री हिना खाने (Hina Khan) म्हटलंय. 'ते लवकरात लवकर बरे व्हावेत यासाठी आम्ही प्रार्थना करत आहोत. काही गरज लागल्यास कळव', असं अभिनेता करणवीर बोहराने लिहिलं.

शाहीर शेख सध्या 'पवित्र रिश्ता २' या मालिकेत भूमिका साकारत आहे. शाहीर आणि अंकिता लोखंडेच्या या मालिकेचा ट्रेलर नुकताच प्रदर्शित करण्यात आला. २८ जानेवारीपासून ही मालिका झी5 या ओटीटी प्लॅटफॉर्मवर प्रेक्षकांच्या भेटीला येणार आहे.

जानेवारीच्या दुसऱ्या आठवड्यात २० हजारांवर पोहोचलेली मुंबईतील दैनंदिन कोरोना रुग्णसंख्या आता घसरू लागली आहे. शहरात मंगळवारी ६ हजार १४९ नवे रुग्ण आढळले, तर सात रुग्णांचा मृत्यू झाला. नव्या कोरोनाबाधितांपेक्षा कोरोनामुक्त रुग्णांची संख्या अधिक असून, मंगळवारी एका दिवसात १२ हजार ८१० रुग्ण कोरोनामुक्त झाले.