Rajinikanth wife fraud case: सुपरस्टार रजनीकांत हे नेहमी कोणत्या ना कोणत्या कारणाने चर्चेत असतात. त्यांचे सिनेमे प्रेक्षकांचे मनोरंजन करतात. त्यांच्या चाहत्यांची संख्या जगभरात आहे. मात्र आता रजनीकांत नव्हे तर त्यांची पत्नी चर्चेत आली आहे. रजनीकांत यांची पत्नी लता रजनीकांत यांच्या विरोधात गेल्या काही काळापासून फसवणुकीचा खटला सुरू आहे.

लतादीदींनी आरोप फेटाळून लावत असा दावा केला की "सेलिब्रेटी असल्याची किंमत मोजावी लागत आहे." लता रजनीकांत यांनी एएनआयला सांगितले, 'ही माझ्यासाठी खूप अपमानाची बाब आहे, हीच किंमत आम्हाला सेलिब्रिटी म्हणून चुकवावी लागली आहे. त्यामुळे प्रकरण मोठं नसलं तरी बातमी खूप मोठी होते. कोणतीही फसवणूक झालेली नाही, माझा पैशांशी काहीही संबंध नाही."

ही फसवणूक सुपरस्टार रजनीकांत स्टारर 'कोचादईयां' या चित्रपटाशी संबंधित आहे. हा खटला कर्नाटक उच्च न्यायालयाने रद्द केला असला तरी सर्वोच्च न्यायालयाने ऑक्टोबरमध्ये तो आरोप पुन्हा पूर्ववत केला. आता पत्नी लतादीदींनी या प्रकरणी आपले वक्तव्य केले आहे.

काय आहे प्रकरण

चेन्नईस्थित अॅड ब्युरो अॅडव्हर्टायझिंग प्रायव्हेट लिमिटेडने रजनीकांत यांच्या पत्नीविरुद्ध 2014 च्या चित्रपटाच्या हक्काबाबत फसवणुकीचा गुन्हा दाखल केला आहे. तक्रारकर्त्याने असा दावा केला की त्याने चित्रपटाच्या निर्मात्यांपैकी एक असलेल्या मीडिया वनला 10 कोटी रुपये दिले होते आणि लता रजनीकांत यांनी जामीनदार म्हणून साइन केले होते.

या आरोपावर लता रजनीकांत म्हणाल्या होत्या की, ज्या पैशांबद्दल बोललं जातंय त्याच्याशी त्यांचा काहीही संबंध नाही. ही बाब मीडिया वन आणि संबंधित लोकांमधील आहे. एक जामीनदार म्हणून मी खात्री केली होती की त्यांना पैसे दिले गेले आहेत.

या प्रकरणी 2022 मध्ये कर्नाटक उच्च न्यायालयाने लतादीदींना दिलासा दिला होता, परंतु काही काळानंतर सर्वोच्च न्यायालयाने लतादीदींवर लावलेली चार कलमे पुन्हा पूर्ववत करण्यात आले. आता या प्रकरणी काय निकाल लागतो याकडे सर्वांचे लक्ष लागले आहे.