सोशल मीडियामुळे सेलिब्रिटी आणि चाहते यांच्यातली दरी कमी झाली असली तरी अनेकदा सेलिब्रिटींना ट्रोलिंगचा मोठ्या प्रमाणावर सामना करावा लागतो. या ट्रोलिंगविरोधात मराठी अभिनेत्री तेजस्विनी पंडितने तिच्या इन्स्टाग्राम अकाऊंटवर एक पोस्ट लिहिली होती. 'सोशल मीडियावर प्रचंड प्रमाणात होणारं ट्रोलिंग थांबवा. समोरचा व्यक्ती त्याच्या वैयक्तिक आयुष्यात कोणत्या गोष्टींचा सामना करतोय, तो समस्यांना सामोरं जातोय हे कोणालाच माहित नसतं. पण तुमच्या नकारात्मक कमेंट्समुळे एखाद्याच्या मनावर खूप वाईट परिणाम होऊ शकतो', असं तिने लिहिलं होतं. त्यानंतर आता ती नुकत्याच दिलेल्या एका मुलाखतीत याच विषयावर मोकळेपणाने व्यक्त झाली आहे. मराठी अभिनेत्रींना त्यांच्या पोशाखावरून फार ट्रोल केलं जातं. पण मराठी अभिनेत्री बोल्ड फोटो शेअर करू शकत नाही का, असा सवाल तिने ट्रोलर्सना केला. 

'ई टाइम्स'ला दिलेल्या मुलाखतीत तेजस्विनी म्हणाली, "विशेषकरून मराठी अभिनेत्रींना त्यांच्या कपड्यांवरून खूप ट्रोल केलं जातं. हे खूपच अपमानकारक आहे आणि त्या गोष्टींच्या पूर्णपणे विरोधात आहे. जर तुम्ही काही चांगलं बोलू शकत नाही तर त्यापेक्षा तुम्ही काहीच बोलू नका. एखादा व्यक्ती त्याच्या खासगी आयुष्यात कोणत्या गोष्टींना सामोरं जात असेल हे आपल्याला काय माहित? मला एक गोष्ट कळत नाही की मराठी अभिनेत्रींनी बोल्ड फोटो शेअर केलं तर काय चुकलं? मराठी अभिनेत्री बोल्ड फोटो शेअर करू शकत नाही का? बॉलिवूड अभिनेत्री कोणत्याही प्रकारचे फोटो पोस्ट केले तर हेच ट्रोलर्स त्यांचं कौतुक करत असतात. आम्हीसुद्धा अभिनेत्री आहोत आणि आमचंसुद्धा काम सारखंच आहे. आम्ही तेच करत आहोत तर आमचं काय चुकलं?"

हेही वाचा : बॉलिवूडची 'क्वीन' आई-वडिलांना होती नकोशी

"मी पडद्यावर कोणतीही भूमिका साकारू शकते. मग ती आई असो, वेश्या असो, मोलकरीण असो किंवा आणखी काही. पण पडद्यामागे मी तशीच आहे असा अर्थ होत नाही. लोकांनी हे समजून घेतलं पाहिजे आणि सोशल मीडिया पोस्टवरून सेलिब्रिटींवर विशिष्ट गोष्टींचा ठपका ठेवणं बंद केलं पाहिजे. मी कोणाला थांबवू शकत नाही. पण माझ्याकडे दुर्लक्ष करण्याचा उपाय आहे आणि अनेकदा मी तेच करते", असंही ती पुढे म्हणाली.