अभिनेता वरुण धवनचा (Varun Dhawan) ड्राइव्हर मनोज याचं हृदयविकाराच्या झटक्याने निधन झालं. एका ब्रँडच्या शूटिंगसाठी मनोजने वरुणला सेटवर नेलं होतं. मात्र सेटवर त्याला अचानक हृदयविकाराचा झटका आला. मनोजला तातडीने लिलावती रुग्णालयात दाखल करण्यात आलं होतं. मात्र उपचारादरम्यान त्याची प्राणज्योत मालवली. लिलावती रुग्णालयाचे डॉक्टर अजय पांडे यांनी मनोजच्या निधनाची बातमी दिली. (Varun Dhawan's driver dies due to heart attack)

एका न्यूज पोर्टलने दिलेल्या वृत्तानुसार, मनोज हा वरुण धवन आणि त्याच्या कुटुंबीयांच्या जवळचा व्यक्ती होता. एका जाहिरातीच्या शूटिंगनिमित्त त्याने वरुणला मेहबूब स्टुडिओला सोडलं होतं. सेटवर पोहोचताच त्याच्या छातीत दुखू लागलं आणि हृदयविकाराचा झटका आला. मनोजच्या निधनाने वरुण आणि त्याच्या कुटुंबीयांना मोठा धक्का बसला आहे. वरुणचे वडील डेव्हिड धवन यांनी वरुणचं सांत्वन करण्याचा प्रयत्न केला. त्याचप्रमाणे मनोजच्या कुटुंबीयांची जबाबदारी घेणार असल्याचं सांगितलं.

वरुणनेच रुग्णालयातील सर्व औपचारिक प्रक्रिया पूर्ण केल्या असून त्याच्या टीमने त्यात मदत केली. गेल्या काही वर्षांपासून मनोज हा वरुणसोबत काम करत होता. यादरम्यान दोघांमध्ये चांगली मैत्री झाली होती. सोशल मीडियावर वरुणसोबतचे मनोजचे काही फोटो व्हायरल होत आहेत. या फोटोंमध्ये वरुण आणि मनोज यांच्यामधील मैत्री सहज पहायला मिळते.