परभणी: आयएएस अधिकारी आंचल गोयल (aanchal goyal) यांच्या नियुक्तीवरून सध्या मोठा गदारोळ निर्माण झाला आहे. गोयल यांची जिल्हाधिकारीपदी नियुक्ती झाल्यानंतर त्या रुजू होण्याच्या अगोदरच त्यांची बदली रद्द करण्यात आली होती. यामुळे आज परभणीत नागरिकांनी जिल्हाधिकारी कार्यालयसमोर आंदोलन सुरू केले आहे. या प्रकरणात राजकारण झाले असल्याचे मत नागरिंकाचे आहे.

आंचल गोयल यांच्या नियुक्तीनंतर जिल्ह्यातील नेत्यांनी त्यांच्या बदली रद्द होण्यासाठी प्रयत्न केले असंही बोललं जात आहे. गोयल यांची नियुक्ती रद्द करण्यासाठी अनेकांनी मंत्रालयापर्यंत धाव घेतली असल्याचेही सांगितले जातेय. अतिरिक्त जिल्हाधिकारी राजेश काटकर यांच्याकडे पदभार सोपवावा अशा आदेशाचे पत्र जिल्हाधिकारी दीपक मुगळीकर यांना मंत्रालयातून आले. त्यानंतर श्री.काटकर यांच्याकडे पदभार सोपविण्यात आला होता.