खुलताबाद : तीसगाव (ता. खुलताबाद) येथील शासकीय आदिवासी आश्रमशाळेतील ९६ विद्यार्थ्यांना दुधातून विषबाधा झाल्याची घटना मंगळवारी (ता. १३) सकाळी घडली. या बाधित सर्व विद्यार्थ्यांना उपचारार्थ वेरूळ येथील प्राथमिक आरोग्य केंद्र तसेच खुलताबाद ग्रामीण रुग्णालयात दाखल करण्यात आले असून सर्वांची प्रकृती स्थिर आहे.

खुलताबाद तालुक्यातील तीसगाव येथे शासकीय आदिवासी आश्रमशाळा असून, येथे ३१७ विद्यार्थी निवासी शिक्षण घेतात. या शाळेतील विद्यार्थ्यांना नेहमीप्रमाणे मंगळवारी सकाळी दूध देण्यात आले. ते प्राशन केल्यानंतर विद्यार्थ्यांना मळमळ, जुलाब व उलट्या यांसारखा त्रास जाणवू लागला.

पाहता-पाहता ही संख्या ९० च्या पुढे गेली. शिक्षकांनी वेरूळ येथील प्राथमिक आरोग्य केंद्रात ६९ विद्यार्थ्यांना तर खुलताबाद येथील ग्रामीण रुग्णालयात २७ विद्यार्थ्यांना दाखल केले. सर्व विद्यार्थ्यांची प्रकृती स्थिर असून, या घटनेबाबत वरिष्ठांना कळविण्यात आल्याचे मुख्याध्यापक विलास कटारे यांनी सांगितले.