औरंगाबाद : सराईत घरफोडी करणारा सकाळी ११ च्या सुमारास चोरीच्या गुन्ह्यातून हर्सूल कारागृहाच्या बाहेर आला आणि मध्यरात्रीच चार कार्यालये फोडली. सीसीटीव्ही चित्रीकरणाच्या आधारे या चोरट्याला पोलिसांनी शोधून काढले व बेड्या ठोकल्याची माहिती क्रांतीचौक पोलीस ठाण्याचे वरिष्ठ निरीक्षक डॉ. गणपत दराडे यांनी दिली

रेकॉर्डवरील आरोपी ईश्वर गौडा हा चोरीच्या गुन्ह्यात दोन सप्टेंबर रोजी सकाळी हर्सूल कारागृहातून बाहेर आला होता. त्यानंतर त्याने चोरी करण्यासाठी निराला बाजार भागात ‘रेकी’ केली. मध्यरात्री १२ नंतर त्याने आयुष गंगवाल यांचे निराजा बाजार येथील ऑफिस फोडले. तेथून १५ हजार रुपयांचे चांदीचे तीन शिक्के, ७५ हजार रुपये किमतीचे पाच संगणक चाेरले.

त्यानंतर सावन चुडीवाल यांच्या ऑफिस फोडून दोन हजार रुपये रोख, स्वप्निल उपाध्याय यांच्या ऑफिस मधून १५ हजार रुपयांची संगणकाची हार्डडिस्क, डॉ. मुंदडा यांच्या कार्यालयातून दोन पोर्टेबल सीसीटीव्ही कॅमेरे असा एकूण १ लाख ११ हजार रुपयांचा मुद्देमाल चोरून नेला.

या घटनेच्या गुन्ह्याचा तपास विशेष पथकाचे उपनिरीक्षक विकास खटके, तपास अधिकारी उपनिरीक्षक प्रभाकर सोनवणे यांच्या पथकाने केला. सीसीटीव्ही चित्रीकरणाची तपासणी केल्यानंतर गौडा यानेच चोरी केल्याचे स्पष्ट झाले. त्यानुसार गौडा यास ताब्यात घेत चौकशी केल्यानंतर त्याने चोरीची कबुली दिली ; तसेच ४४ हजार रुपयांची मुद्देमालही काढून दिला. ही कामगिरी निरीक्षक डॉ. दराडे यांच्या मार्गदर्शनात उपनिरीक्षक खटके, साेनवणे, हवालदार संतोष मुदिराज, नरेंद्र गुजर, इरफान खान, भाऊलाल चव्हाण, संतोष सूर्यवंशी, हनुमंत चाळणेवाड, कृष्णा चौधरी यांच्या पथकाने केली.