छत्रपती संभाजीनगर : स्नॅपचॅटवर ओळख झालेला बारामती येथील एक युवक एका १७ वर्षीय मुलीला ब्लॅकमेल करीत होते. दामिनी पथकाने त्याला पकडून सातारा पोलिस ठाण्याच्या स्वाधीन केले. ही कारवाई वाल्मी रस्त्यावर करण्यात आली.

पैठण रस्त्यावरील एका वसतिगृहात राहणाऱ्या १७ वर्षीय तरुणीने कॉल करत दामिनी पथकाकडे मदत मागितली. पथकाच्या हेड कॉन्स्टेबल निर्मला निंभोरे, संगीता परळकर, पोलिस अंमलदार अमृता भोपळे प्रियांका भिवसने यांनी घटनास्थळ गाठले. त्यांनी पीडित तरुणीला धीर दिला. नंतर तिने आपबिती सांगितली.

तिची स्नॅपचॅटवर एका युवकाशी ओळख झाली. तो मला दोन वेळा जिल्ह्याबाहेर भेटला. परंतु आता त्याला भेटायची इच्छा नाही तरीही तो अनेक दिवसांपासून ब्लॅकमेल करीत आहे. सकाळपासून सारखे कॉल, मेसेज करून भेटायला होस्टेलच्या बाहेर ये म्हणून त्रास देत असल्याने तिने सांगितले.

पथकाने रचला सापळा

संबंधित तरुण पीडित मुलीला कांचनवाडी उड्डाणपुलाच्या खाली बोलवीत होती. त्यानंतर दामिनी पथकाच्या मधील काही कर्मचाऱ्यांनी पैठण रोड उड्डाण पुलाखाली सापळा लावला. संशयित रसवंतीवर आला. तो मुलीशी बोलत असतानाच दामिनी पथकाने त्याला ताब्यात घेतले. पुढील कार्यवाहीसाठी त्याला सातारा पोलिस ठाण्यात हजर करण्यात आले.

मुलीला नेणार होता बाहेर

या मुलीने दामिनी पथकाला माहिती देताना सांगितले की आरोपी मला बाहेर कुठे तरी नेणार आहे. पथकाने या त्याला पकडल्यानंतर तो पुणे, बारामती येथे वाहनचालक असल्याची माहिती समोर आली. दामिनी पथकाला त्याने वारंवार विनंती करीत मला एक पत्नी आणी मुलगा असून, घरी काही कळवू नका असे सांगितले. मात्र, पथकाने त्याला सातारा पोलिस ठाण्याच्या स्वाधीन केले.

सोशल मीडियाचा वापर करीत मुली, तरुणींची फसवणूक होण्याचे प्रकार वाढले आहेत. मुली जाळ्यात अडकत आहेत. या मुलीने समोर येत खूप मोठे धाडस केले. सोशल मीडियाचा वापर करताना काळजी घ्यावी, अनोळखी व्यक्तीला प्रतिसाद देऊ नये.

- निर्मला निंभोरे, हेड कॉन्स्टेबल, दामिनी पथक