छत्रपती संभाजीनगर : गौण खनिजाची अवैधरीत्या वाहतूक केल्या प्रकरणी जप्त करण्यात आलेला हायवा पाच जणांनी तहसील कार्यालयातून चोरला असल्याचे सीसीटीव्ही फुटेजमधून समोर आले आहे. या प्रकरणात आता पोलिसांनी तपास, कारवाई करावी असे पत्र तहसीलदारांनी सीटीचौक पोलिस ठाण्यास पाठवले आहे.

तहसीलदार विजय चव्हाण यांनी सांगितले की, तहसील कार्यालयातून चोरी करण्यात आलेल्या हायवा प्रकरणी गुन्हा दाखल करण्यात आला असून १३ जून रोजी पाच ते सहा जणांनी हा हायवा पळवला असल्याचे सीसीटीव्हीमध्ये दिसून येत आहे. प्रकरणात सहभागी असलेल्या लोकांची नावेही पोलिस ठाण्यास पाठवली आहेत.

या प्रकरणात या पाच लोकांशिवाय आणखी लोकांचा सहभाग असण्याची शक्यता असून, त्यामुळे संबंधितांच्या मोबाईल तपास केला तर सदर गुन्ह्यात सहभागी असलेल्या आरोपींचा शोध घेणे सोईस्कर ठरेल त्या अनुषंगाने तपास करण्यात यावा असे पत्र अपर तहसीलदार विजय चव्हाण यांनी सिटीचौक पोलिस ठाण्याच्या पोलिस निरीक्षकांना पाठवले आहे.