छत्रपती संभाजीनगर : किरकोळ बाजारातील भाजीपाल्यांचे दर वाढले आहेत. फोडणीसाठी लागणारे लसूण, अद्रक आणि कांद्यांच्या किंमत वाढल्यामुळे घरा-घरांतील महिन्याचे बजेट कोलमडले आहे.सोमवारी (ता. चार) किरकोळ बाजारात लसूण ३६० ते ४०० रुपयांनी विक्री झाला. त्याच पाठोपाठ अद्रकीचा दर दोनशे रुपये किलोपर्यंत गेला आहे. होलसेलपेक्षा किरकोळ बाजारात पालेभाज्या, फळांच्या किमतीत वाढतच चालल्या असल्याचे भाजी विक्रेत्यांनी सांगितले.

लसणाची आवक बाजार समितीत कमी झाली आहे. यामुळे किरकोळ बाजारात लसणाच्या किमतीने उसळी घेतली. यासह लासूर स्टेशन, वैजापूर, नाशिक या भागांतून शहरात विक्रीसाठी येणाऱ्या कांद्याची आवक कमी झाल्यामुळे किरकोळ बाजारात कांदा भाव खात आहे. २० ते ३० रुपये किलो मिळणारा कांदा सध्या ६० ते ८० रुपये किलोने विक्री होत आहे. काही ठिकाणी तर कांदा शंभर रुपये किलोने विक्री झाला. किरकोळ बाजारात लसूण हा ८० ते ९० रुपये पावशेर होता. तर अद्रकही ५० ते ६० रुपये पावशेरप्रमाणे विक्री झाले आहे.

किरकोळ विक्रेता हा बाजार समितीतून पालेभाज्यांचा माल घेतो. शहरात वेगवेळ्या भागांत पालेभाज्या व फळभाज्यांचा दर वेगवेगळा आहे. किरकोळ बाजारात लसूण ३६० ते ४०० रुपये किलोने विक्री झाला. अद्रकीला मागणी आहे पण आवक कमी असल्याने अद्रकीची १८० ते २०० रुपये किलोने विक्री झाली. कांदेही ७० ते ८० रुपये किलोने विक्री झाले. भविष्यात ते १०० रुपयांपर्यंत जाण्याची शक्यता आहे.

— राजू शेळके, किरकोळ भाजीपाला विक्रेते.

अद्रकची थेटबांधावरूनच खरेदी

कन्नड, फुलंब्री तालुक्यातील बाजार समितीसह शहरात अद्रक विक्रीसाठी येते. मात्र, गेल्या वर्षभरापासून व्यापारी थेट शेतकऱ्यांच्या बांधावर येत आहेत. यामुळे बाजार समितीत केवळ १० टक्के आवक होत आहे. जागेवर चांगला भाव मिळत असल्याने अद्रक उत्पादक शेतकरी हा तेथेच व्यवहार करीत आहे. यामुळे येथील चांगला माल इतर शहरात जात आहे. आवक कमी झाल्याने भाववाढ होत असल्याचे बाजार समितीतर्फे सांगण्यात येत आहे.