भोकरदन : अनैतिक संबंधास अडथळा ठरणाऱ्या पत्नीची हत्या करणाऱ्या रतन सांडू साळवे (वय ४०, रा. कुंभारी, ता.भोकरदन) यास जिल्हा व सत्र न्यायालयाचे न्यायाधीश एस.डी.भगत यांनी जन्मठेपेची व दहा हजार रुपये दंड व दंड न भरल्यास तीन महिने साधा कारावास अशी शिक्षा ठोठावली आहे.

भोकरदन तालुक्यातील कुंभारी येथील रतन साळवे याचे अनैतिक संबंधाच्या कारणावरून पत्नीशी नेहमी भांडण होत असे. आरोपी हा नेहमी पत्नीला व मुलांना मारहाण करीत असे त्यामुळे सततच्या त्रासाला कंटाळून आशा ही मुलगा व मुलगी यांना सोबत घेऊन काम करण्यासाठी छत्रपती संभाजीनगर येथे गेली होती.

काही दिवसांनी रतन हा गावात कामधंदा नसल्याने पत्नी आशाबाईकडे गेला होता. त्यानंतर ता. १५ जानेवारी २०२१ रोजी कुंभारी ग्रामपंचायतीचे मतदान असल्याने पती व पत्नी हे दोघेही मतदान करण्यासाठी गावी आले होते.

त्या दिवशी गावातच स्वतःच्या घरी मुक्कामी राहिले होते. ता.१६ जानेवारीला सायंकाळी साडेपाच वाजता आशा हिच्या घराला बाहेरून कुलूप लावलेले होते. खिडकीतून डोकावून पाहिले असता फिर्यादीला तिच्या नाका तोंडातून रक्त येत असल्याचे दिसून आले. घटनास्थळी पोलिसांनी धाव घेतली. घराचे कुलूप तोडून आत प्रवेश केल्यावर मयत आशाबाई यांना विजेचा शॉक देवून तसेच विषारी द्रव्य पाजून व लोखंडी रॉड मारून खून केल्याचे आढळून आले.

या प्रकरणी आरोपीविरुद्ध खुनाचा गुन्हा दाखल करून पोलिस उपनिरीक्षक बी.टी. नागरगोजे यांनी न्यायालयात दोषारोपपत्र दाखल केले. सरकार पक्षातर्फे या प्रकरणात एकूण १० साक्षीदार तपासण्यात आले. त्यामध्ये फिर्यादी व मयताचा मुलगा, डॉक्टर, पंच, इतर साक्षीदार व तपासीक अंमलदार बी.टी. नागरगोजे यांच्या साक्षी महत्त्वाच्या ठरल्या.

न्यायालयाने पुरावा व युक्तिवाद लक्षात घेऊन आरोपी रतन सांडू साळवे यास जन्मठेपेची व दहा हजार रुपये दंड व दंड न भरल्यास तीन महिने साधा कारावास अशी शिक्षा ठोठावली आहे. या प्रकरणात सरकार पक्षातर्फे अतिरिक्त सरकारी अभियोक्ता अशोक बी. सोनवणे यांनी कामकाज पाहिले.