औरंगाबाद : महाराष्ट्र नवनिर्माण सेनेचे अध्यक्ष राज ठाकरे हे औरंगाबादच्या दौऱ्यावर येण्यापूर्वीच पक्षाच्या पदाधिकाऱ्यांनी शिवसेनेत (Shiv Sena) प्रवेश केला आहे. येत्या १४ डिसेंबरला ठाकरे औरंगाबादेत येत असून ते मराठवाड्याचा दौरा करणार आहेत. मनसेच्या पदाधिकाऱ्यांनी पालकमंत्री तथा उद्योगमंत्री सुभाष देसाई (Subhash Desai) व शिवसेनेचे जिल्हाध्यक्ष आमदार अंबादास दानवे यांच्या उपस्थितीत प्रवेश केला. या प्रसंगी देसाई म्हणाले, की मनसे गळक घर असून मनसेचे पदाधिकारी स्वगृही परत येत आहेत. शिवसेनेचा वाडा गळका नसून येथे प्रवेश मिळतो. पण बाहेर जाण्यासाठी कोणी दरवाजा उघडत नाही, असे त्यांनी सांगितले. (Aurangabad Mahapalika Nivadnuk)

सध्या औरंगाबाद महापालिकेच्या निवडणुकीच्या तयारीला सर्वच राजकीय पक्ष लागले आहेत. एमआयएमच्या काही माजी नगरसेवकांनी राष्ट्रवादीत प्रवेश केला आहे. दुसरीकडे महाविकास आघाडी निवडणूक एकत्र लढणार आहे का ? असाही प्रश्न उपस्थित केला जात आहे. जो-तो स्वबळाची भाषा करित आहे. औरंगाबादेत मनसेची दखल घ्यावी असे अस्तित्व दिसत नाही. त्यातच मनसे प्रमुख राज ठाकरे यांच्या दौऱ्यापूर्वीच त्यांच्या पक्षाच्या नेत्यांनी शिवसेनेत प्रवेश केला आहे.