औसा (लातूर): जन आशीर्वाद यात्रेच्या निमित्ताने घेतलेल्या पत्रकार परिषदेत केंद्रीय मंत्री नारायण राणे यांनी मुख्यमंत्री उद्धव ठाकरे यांच्या विषयी केलेल्या आक्षेपार्ह वक्तव्याच्या तीव्र प्रतिक्रिया औशात उमटल्या. मंगळवारी (ता.२४) दुपारी बारा वाजण्याच्या सुमारास शिवसैनिकांनी मंत्री नारायण राणे यांच्या प्रतिमेला जोडे मारून येथील अप्रोच चौकात त्यांचा प्रतिकात्मक पुतळा जाळण्यात आला. यावेळी शिवसैनिकांनी तीव्र निषेध करीत त्यांच्यावर कारवाई करण्याची मागणी केली.

केंद्रीय मंत्री नारायण राणे यांची मुख्यमंत्री उद्धव ठाकरे यांच्यावर टीका करताना जीभ घसरली होती. त्यांनी मी तिथे असतो तर कानशिलात लावली असती अशी प्रतिक्रिया एका पत्रकार परिषदेत दिली होती. याचे तीव्र पडसाद औसा शहरासह तालुक्यात दिसून आले. शिवसैनिकांनी येथील अप्रोच चौकात मंत्री श्री. राणे यांच्या प्रतिमेला जोडे मारत "कोंबडी चोर राणेंचा निषेध असो" आशा घोषणा देत त्यांचा प्रतिकात्मक पुतळा जाळला.

त्यानंतर या शिवसैनिकांनी तहसीलदार यांना निवेदन देत नारायण राणे यांच्यावर कठोर कारवाई करण्यात यावी अशी मागणी केली. या आंदोलनात शिवसेनेचे तालुका प्रमुख सतीश शिंदे, शहर प्रमुख सुरेश भुरे, संजय उजळंबे, रोहित गोमदे, गणेश गायकवाड, जयंत चंदनशिवे यांच्यासह अनेक शिवसेनेचे अनेक कार्यकर्ते सहभागी झाले होते.