वारंगा फाटा (हिंगोली): जन आशीर्वाद यात्रेनिमित्त केंद्रीय अर्थ राज्यमंत्री डॉ. भागवत कराड (bhagwat karad) मराठवाडा दौऱ्यावर आहेत. मंगळवारी त्यांनी नांदेडचा दौरा आटपून वारंगा मार्गे हिंगोलीकडे येत असताना वारंगा फाटा येथे शेतात जाऊन सोयाबीनची पाहणी केली. यावेळी शेतकऱ्यांनी साहेब आम्ही पिठलं-भाकरी आणली खाणार का असे विचारले असता डॉ . कराड यांनी बाजेवर बसून पिठलं–भाकरी आणि ठेचा खात शेतकऱ्यांच्या समस्या जाणून घेतल्या.

केंद्रीय अर्थ राज्यमंत्री डॉ. भागवत कराड हिंगोलीकडे येत असताना कळमनुरी तालुक्यातील वारंगा फाटा येथे भाजपा कार्यकर्त्यांनी त्यांचे स्वागत केले. त्यानंतर त्यांनी रिमझिम पावसातच सोयाबीनच्या पिकाची पाहणी केली. पाहणी झाल्यानंतर डॉ. कराड परत निघाले असताना उपस्थित शेतकऱ्यांनी त्यांना जेवणाचा आग्रह केला. डॉ. कराड यांनी क्षणाचाही विलंब न करता जेवणाचे आमंत्रण स्वीकारले. येथील अजय कदम यांच्या शेतातील आखाड्यावर पिठलं-भाकरी आणि ठेच्याचा आस्वाद घेतला.

यावेळी डॉ. कराड यांनी उपस्थित शेतकऱ्यांशी संवाद साधून पीक विम्याबद्दलच्या शेतकऱ्यांच्या अडचणी जाणून घेतल्या. पंतप्रधान नरेंद्र मोदी शेतकऱ्यांच्या खात्यावर पैसे जमा करतात ते तुम्हाला मिळतात का असा प्रश्न केला असता आम्हाला ते पैसे मिळतात असे उत्तर शेतकऱ्यांनी दिल्यानंतर डॉ. कराड यांनी समाधान व्यक्त केले. तसेच काही शेतकऱ्यांचा रस्त्यात गेलेल्या शेतीचा भूसंपादन मोबदला बाकी असल्याचे सांगितले. यावर मी तत्काळ संबंधित अधिकाऱ्यांना बोलून तुमचा प्रश्न मार्गी लावतो असे आश्वासन यावेळी मंत्री डॉ . भागवत कराड यांनी शेतकऱ्यांना दिले.