हिंगोली : वसमत तालुक्यातील बोराळा येथे सलग तीन दिवसात तीन तरुणांनी वेगवेगळ्या कारणाने गळफास घेऊन आत्महत्या केली आहे. या घटनेमुळे गावावर शोककळा पसरली आहे. यापैकी दोन घटनांची नोंद वसमत येथील ग्रामीण पोलीस ठाण्यात करण्यात आली आहे. तिघांपैकी एक विवाहित तर दोन अविवाहित आहेत.

जिल्ह्यात यावर्षी अतिवृष्टीने पिकांचे मोठे नुकसान झाले आहे. सध्या सोयाबीन काढणी सुरू आहे. मात्र संततधार पावसाने त्यात व्यत्यय येत आहे. या कारणामुळे शेतकरी चिंतेत आहेत. बँकेचे कर्ज कसे फेडावे असा प्रश्न निर्माण झाला आहे. याच विवंचनेतून बोराळा (ता. वसमत) येथील प्रभाकर जाधव (वय ३२) यांनी राहत्या घरी शुक्रवारी (ता. नऊ) सायंकाळी सहा वाजता गळफास घेऊन आत्महत्या केली. त्यांच्या पश्चात पत्नी, दोन मुले, आई, वडील असा परिवार आहे.

हेही वाचा - हिंगोली : नवरात्रोत्सव जवळ आल्याने दूर्गा मुर्ती तयार करण्याचे काम अंतीम टप्प्यात

दुसरी घटना

तर याच गावातील दुसऱ्या घटनेत संतोष बालाजी खराटे (वय २२) याने शनिवारी (ता. दहा) दुपारी चार वाजता गळफास घेऊन आत्महत्या केली. दरम्यान धमक्यांच्या त्रासाला कंटाळून संतोषने आत्महत्या केली असल्याचा आरोप नातेवाईकांनी केला आहे. संतोषच्या आईच्या फिर्यादीवरुन वसमत ग्रामीण पोलीस ठाण्यात चार जणांविरोधात गुन्हा दाखल करण्यात आला आहे. हा अविवाहित आहे. त्याच्या पश्चात आई, वडील, भाऊ, बहिण असा परिवार आहे.

तिसरी घटना

बोराळा गावातील तिसरी घटना ही रविवारी (ता. ११) सायंकाळी उशिरा घडली आहे. या घटनेत राजू गंगातीरे यांनी गावा शेजारील एका लिंबाच्या झाडाला गळफास घेऊन आत्महत्या केली. हा तरुण देखील अविवाहित आहे. याच्या पश्चात आई, वडील, तीन बहिणी असा परिवार आहे.

येथे क्लिक करा - विजेपासून स्वत:चा बचाव करण्यासाठी नागरिकांनी खबरदारी घ्यावी- रुचेश जयवंशी 

आत्महत्या करणारे तीनही तरुण शेतकरी कुटुंबातील

राजू याचा मृतदेह वसमत येथील रुग्णालयात ठेवण्यात आला असून, त्याचे शवविच्छेदनानंतर गुन्हा दाखल केला जाणार असल्याची माहिती पोलिसांनी दिली आहे. आत्महत्या करणारे तीनही तरुण शेतकरी कुटुंबातील आहेत. तसेच ते कुटुंबातील प्रमुख होते. या तरुणांच्या आत्महत्येने कुटुंबासह गावावर या घटनेमुळे शोककळा पसरली आहे. त्यांच्या आत्महत्येची चर्चा गाव व परिसरात हळहळ व्यक्त होत आहे.

संपादन - प्रल्हाद कांबळे