हिंगोली : आगामी लोकसभा आणि त्यानंतर होणाऱ्या विधानसभा निवडणुकीच्या अनुषंगाने सर्वच पक्षांची मोर्चेबांधणी सुरू झाली आहे. या अंतर्गत गुरुवारी (ता. २२) हिंगोलीत काँग्रेसच्या प्रमुख नेत्यांनी आढावा बैठक घेतली. या बैठकीनंतर आमदार डॉ. प्रज्ञा सातव यांनी अशोक चव्हाण हे पुन्हा राज्याचे मुख्यमंत्री होतील, असा विश्वास व्यक्त केला.

शंभर टक्के नाही तर दोनशे टक्के चव्हाण हे मुख्यमंत्री होतील आणि राज्यात विधानसभेच्या सर्वाधिक जागाही काँग्रेसच जिंकेल, असा दावादेखील सातव यांनी माध्यमांशी बोलताना केला. लोकसभा निवडणुकीच्या तयारीचा भाग म्हणून काँग्रेसकडून मराठवाड्यातील अनेक जिल्ह्यांमध्ये आढावा बैठका सुरू आहेत.

महाविकास आघाडी सरकारमध्ये जागा वाटपासंदर्भात प्राथमिक बोलणी झाली असून, काँग्रेसने हिंगोली मतदार संघावरदेखील दावा सांगितला आहे. या पार्श्वभूमीवर काँग्रेसच्या मराठवाड्यातील नेत्यांनी आढावा बैठक घेतली. आमदार सातवदेखील या बैठकीला उपस्थितीत होत्या.

बैठकीनंतर माध्यमांशी बोलताना त्यांनी अशोक चव्हाण यांचा उल्लेख भावी मुख्यमंत्री म्हणून केला. यावर त्या ठामही होत्या. अशोक चव्हाण हे या आधी राज्याचे मुख्यमंत्री होते. मराठवाड्यातील व्यक्तीने या राज्याचे नेतृत्व करावे, अशी माझी आणि प्रत्येक काँग्रेस कार्यकर्त्यांची व जनतेची देखील इच्छा आहे, असे त्यांनी सांगितले.