परभणी : पंतप्रधान किसान योजनेचा घेणाऱ्या शेतकऱ्यांना बॅंकिंग क्षेत्राकडून पीककर्ज उपलब्ध करून देण्यासाठी किसान कार्ड देण्याची विशेष मोहीम राबविण्यात येणार आहे. जिल्ह्यात पीएम किसान योजनेचे दोन लाख ९७ हजार लाभार्थी शेतकरी आहेत. यातून किती शेतकऱ्यांकडे पूर्वी कार्ड आहे आणि नवीन किती जणांना मिळाले, याची माहिती मिळणार आहे.

शेतकऱ्यांना सोप्या पद्धतीने एकपानी अर्ज भरून द्यावा लागणार आहे. अर्जाचा नमुना जवळच्या बॅंक शाखेत उपलब्ध करून देण्यात आला आहे. लाभार्थी शेतकऱ्यांनी अर्जासोबत शेतीचे उतारे आणि कर्ज नसल्याबाबतचे घोषणापत्र घेऊन पीएम किसान योजनेंतर्गत संबंधित बॅंकेत संपर्क साधावा. कोणत्याही बॅंक अथवा वित्तीय संस्थेमध्ये पीककर्ज नसणाऱ्या पीएम किसान लाभार्थी शेतकऱ्यांना कर्जप्रक्रिया शुल्क आणि निरीक्षण खर्च बॅंकेकडून माफ करण्यात येणार आहे. केंद्र सरकारच्या वित्तीय सेवा विभागाच्या आदेशानुसार ही मोहीम राबविण्यात येत आहे. आवश्यक कागदपत्रांसंह परिपूर्ण अर्ज प्राप्त झाल्यापासून १५ दिवसांच्या आत शेतकऱ्यांना बॅंकेमार्फत किसान क्रेडिट कार्ड देण्यात येणार आहे. पीएम किसान योजनेंतर्गत अद्याप कोणत्याही वित्तीय संस्था आणि बॅंकेकडून पीककर्ज न घेतलेल्या शेतकऱ्यांनी विशेष मोहिमेचा लाभ घ्यावा, असे आवाहन नाबार्ड आणि जिल्हा अग्रणी बॅंकेच्या वतीने करण्यात आले आहे.

हेही वाचा  -  रागाच्या भरात जुन्या प्रेयसीला संपवणारा प्रियकर ताब्यात !

जवळच्या बॅंकेत अर्ज भरुन द्या 
केंद्र सरकारने मागील वर्षापासून शेतकऱ्यांना अर्थसहाय्य रूपाने सहा हजार रुपये वार्षिक मदत जाहीर केली आहे. परंतु, केंद्रीय वित्त मंत्रालयाच्या असे लक्षात आले आहे की, प्रधानमंत्री किसान योनजेत सहभागी असणाऱ्या बऱ्याच शेतकऱ्यांकडे किसान कार्ड उपलब्ध नाहीत. असे शेतकरी केसीसी कार्ड माध्यमातून मिळणाऱ्या विविध योजनांपासून वंचित राहतात. अशा कार्ड नसलेल्या शेतकऱ्यांशी संपर्क साधून आणि त्यांच्याकडून माहिती घेऊन सर्व बॅंकांनी १५ दिवसांत राबविण्यात येणाऱ्या या विशेष उपक्रमांतर्गत ज्या शेतकऱ्यांकडे केसीसी कार्ड नाही, त्यांनी जवळच्या बॅंक शाखेकडे संपर्क साधून एकपानी अर्ज भरून द्यावा. सर्व बाबींची पूर्तता झाल्यावर बॅंकेमार्फत अशा शेतकऱ्यांच्या त्वरीत कार्ड वितरित केले जाणार आहे.

हेही वाचा व पहा - Video: कामगारांची नोंद होत नसल्याच्या  निषेधार्थ भाकपचे आंदोलन

पशुसंवर्धन व मत्स्यपालकांनाही लाभ
किसान क्रेडिट कार्ड योजनेचा लाभ पशुसंवर्धन व मत्स्यपालकांनाही देण्यात येणार आहे. जे शेतकरी किसान क्रेडिट कार्डधारक आहेत आणि पशुसंवर्धन व मत्स्यव्यवसाय करतात, त्यांना अतिरिक्त वित्त पुरवठा करण्यासाठी हे कार्ड दिले जाणार आहे. त्यासाठी त्यांना शाखेत जावे लागणार आहे.

....स्वतंत्र खिडकी असणार
क्रेडिट कार्ड योजनेसाठी बॅंका विशेष शिबिर आयोजित करणार आहेत. तसेच अर्ज स्वीकारण्यासाठी बॅंकेत स्वतंत्र खिडकी उपलब्ध करून देण्यास व किसान क्रेडिट कार्ड मर्यादा कमीत कमी १४ दिवसांपेक्षा कमी कालावधीत देण्याच्या सूचना आहेत.