बीड : शेअर मार्केटमधून जादा परताव्याचे आमिष दाखवून एका शिक्षकाची तब्बल ११ लाख नऊ हजार ५०० रुपयांची फसवणूक झाल्याची घटना समोर आली. तर, दुसऱ्या घटनेत एकाच्या खात्यावरून ९९ हजार ९९९ रुपये लंपास केल्याची घटना घडली.

तिसऱ्या घटनेत कर्ज देण्याच्या आमिषाने ८१ हजार रुपयांची फसवणूक झाली. या तीनही प्रकरणी सायबर पोलिस ठाण्यात गुन्हा नोंद करण्यात आला.

केज शहरातील विठाईपुरम भागातील रहिवासी शिक्षक सेनल महेंद्र मिश्रा एक सोशल साइट पाहत असताना त्यांना सेकवॉ शेअर मार्केट ट्रेडिंग कंपनीची जाहिरात दिसून आली. त्यावर त्यांनी क्लिक करत संबंधितांशी संपर्क साधला. संबंधितांना सेनल मिश्रा यांना व्हॉटस्ॲप ग्रुपमध्ये ॲड केले आणि शेअर मार्केटमध्ये जास्त नफा मिळवून देण्याचे आमिष दाखवून गुंतवणूक करायला भाग पाडले.