जिंतूर (परभणी) : शहरातील एका व्यापाऱ्यास पोलिसांनी कुटुंबासमोर मारहाण केल्यामुळेच सदरील व्यापाऱ्याने आत्महत्या केली असल्याचा आक्षेप नोंदवून आमदार मेघना साकोरे-बोर्डीकर यांनी या प्रकरणाची सखोल चौकशी करून संबंधितावर कारवाई करण्याची मागणी त्यांनी शुक्रवारी (ता.२) पोलिस अधीक्षक यांच्याकडे केली आहे. 

अंगणवाडीतील पोषण आहाराची चोरी : दोघे गजाआड तर एक फरार

सटवाईमाता मंदिर परिसरातील रहिवासी नारायण डोईफोडे (वय ३८) हे खेडोपाडी फिरूनव बाजारहाट करून किरकोळ कापड विक्रीचा व्यवसाय करत. त्यासाठी त्यांनी दहा लाखाचे कर्ज काढले. परंतु कोरोनाच्या पार्श्वभूमीवरील सततच्या लॉकडाऊनमुळे मागील वर्षभरापासून कापड विक्रीचा व्यवसाय बंद पडल्याने आर्थिक संकटात सापलेल्या डोईफोडे यांच्या समोर कुटुंबाच्या पालनपोषणासह कर्जफेडीचा प्रश्न ऊभा ठाकला.

अशा बिकट परिस्थितीतून मार्ग काढण्यासाठी त्यांनी त्यांच्या मुलासह घर परिसरात हातगाड्यावर भाजीपाला विक्रीच्या व्यवसायाला बुधवारी (३१ मार्च) ला सुरुवात केली. याच दरम्यान संचारबंदीचे कारण देत पोलिसांनी मुलासमोर तसेच कुटुंबियासमोर डोईफोडे यांना जबर मारहाण करून विक्रीचे साहित्य हिसकावून घेतले. पोलिसांच्या या क्रतीमुळे त्यांना मोठा धक्का बसून झालेला अपमान सहन झाला नसल्याने त्यांनी आत्महत्या केली असल्याचा आरोप त्यांच्या नातेवाईकांनी केला.

ही बाब अतिशय गंभीर असल्याने या प्रकरणाची सखोल चौकशी करून व्यापाऱ्याच्या आत्महत्येस जबाबदार ठरणाऱ्यांवर कारवाई करण्याची मागणी आमदार मेघना बोर्डीकर यांनी पोलिस अधीक्षक यांना केली आहे.