परभणी : गेल्या 10 वर्षापासून वेतन मिळत नसल्याच्या कारणावरून सोनपेठ शहरातील मुक्तेश्वर विद्यालयातील शिक्षकांनी कुटूंबासह बुधवारी (ता.22) जिल्हा परिषदेच्या कार्यालयात ठिय्या आंदोलन केले. आंदोलनादरम्यान बाळ रडत असल्यामुळे आंदोलनातील एका शिक्षिकेने शिक्षणाधिकारी कार्यालयातच झोका बाधून बाळाला झोपवले.

सोनपेठ (जि.परभणी) येथील मुक्तेश्वर विद्यालयातील शिक्षक के.टी.तोडकरी, ए.के.लोणे, जे.व्ही.कुलकर्णी, के.पी.जोगदंड, आर.आर.चौरे व पी.आर. बुच्छलवार या सहा शिक्षकांचा गेल्या 10 वर्षापासून पगार बंद आहे. संस्थाचालक बबन कुरे आणि संबंधित मुख्याध्यापक या शिक्षकांवर दबाव आणत असल्याचा आरोप या शिक्षकांनी केला आहे.

पगार नसल्याने कुटंबाची उपासमार होत असल्याचेही य़ा शिक्षकांचे म्हणणे आहे. या संदर्भात या शिक्षकांनी न्यायालयातही धाव घेतली आहे. न्यायालयाने शिक्षकांचे नियमानुसार वेतन द्यावे असा निर्णय दिलेला असतांनाही जिल्हा परिषद शिक्षक विभाग व संबंधीत संस्थाचालक या निर्णयाला मानत नसल्याने या शिक्षकांना वेतनापासून वंचित रहावे लागत असल्याचे या शिक्षकांचे म्हणणे आहे.

बुधवारी (ता.22) या सहा शिक्षकांनी त्यांच्या कुटूंबासह जिल्हा परिषदेच्या शिक्षण विभागात धडक मारली. स्वाभीमानी शेतकरी संघटनेचे जिल्हाध्यक्ष किशोर ढगे यांच्या नेतृत्वाखाली जोरदार ठिय्या आंदोलन केले. यावेळी आंदोलनात सहभागी असलेल्या एका शिक्षिकेचे लहान मुल जोरजोरात रडत होते. त्यामुळे या शिक्षिकेने शिक्षणाधिकारी यांच्या दालनातील छताला कपड्याची झोळी करून मुलाला त्यात झोपवून शांत केले.