हिंगोली: हिंगोलीत केंद्रीय मंत्री नारायण राणे यांनी मुख्यमंत्री उद्धव ठाकरे यांच्याबाबत आक्षेपार्ह वक्तव्य केल्याने मंगळवारी (ता.२४) भाजप व शिवसेनेत चांगलाच तणाव निर्माण झाला आहे. त्यामुळे जिल्ह्यातही वाद उफाळू नयेत यासाठी भाजपा व शिवसेना या दोन्ही कार्यालयासमोर तगडा पोलिस बंदोबस्त ठेवण्यात आला होता. तर औंढा नागनाथ येथे राणे यांच्या प्रतिकात्मक पुतळ्याचे दहन करण्यात आले.

केंद्रीय मंत्री नारायण राणे यांनी मुख्यमंत्री उद्धव ठाकरे यांच्याबाबत जनआशीर्वाद यात्रेदरम्यान आक्षेपार्ह वक्तव्य केल्याने शिवसेनेच्या कार्यकर्त्यांत प्रचंड रोष निर्माण झाला आहे. काही ठिकाणी तर भाजप व शिवसेना कार्यकर्ते आमने सामने आले आहेत. त्याचे पडसाद हिंगोली जिल्ह्यात उमटू नयेत यासाठी खबरदारी म्हणून पोलिस प्रशासनाने जिल्ह्यात शांतता व सुव्यवस्था अबाधित ठेवण्यासाठी नाईक नगर येथील भाजप व बसस्थानकजवळ असलेल्या शिवसेना कार्यालयासमोर पोलिस बंदोबस्त ठेवण्यात आला आहे.

औंढा येथे नारायण राणे यांच्या प्रतिकात्मक पुतळ्याचे दहन-

शहरात केंद्रीय मंत्री नारायण राणे यांनी मुख्यमंत्री उद्धव ठाकरे यांच्याबाबतीत आक्षेपार्ह वक्तव्य केल्याच्या निषेधार्थ शिवसेनेच्या वतीने मंगळवारी (ता. २४) राणे यांच्या प्रतिकात्मक पुतळ्याचे दहन करण्यात आले. तालुका प्रमुख साहेबराव देशमुख यांच्या नेतृत्त्वामध्ये केंद्रीय मंत्री नारायण राणे यांच्या पुतळ्याचे दहन करण्यात आले. यावेळी नारायण राणे यांच्या विरोधामध्ये घोषणाबाजीही करण्यात आली.यावेळी उपजिल्हाप्रमुख जि. डी. मुळे, माजी उपसभापती अनिल देशमुख शहराध्यक्ष अनिल देव, युवा सेना शहराध्यक्ष माधव गोरे सतीश चौढेकर, राम मुळे, शंकर यादव, प्रदीप कनकुटे, सचिन राठोड, राजू वाकुडे, कपील खदारेसह शिवसेनेचे पदाधिकारी मोठ्या संख्येने सहभागी झाले होते.

औंढा शहरांमधून नारायण राणे यांच्या प्रतिकात्मक पुतळ्याचे रॅली काढून औंढा नागनाथ शहरातील जुने बसस्थानक परिसरामध्ये पुतळ्याचे दहन करण्यात आले. घटनास्थळी पोलिस उपनिरीक्षक मुंजाजी वाघमारे पाटील, पोलिस उपनिरीक्षक सुवर्णा वाळके दाखल झाले होते.