निलंगा - गेल्या कांही दिवसापासून तालुक्यात अवकाळी पावसाने कहर केला असून सकाळी तिव्र उन्हाच्या झळा अन् दुपारनंतर पाऊस अशी स्थिती आहे. आज पुन्हा तालुक्यातील कांही भागात अवकाळी पावसाने झोडपले असून सोमवारी ता. २२ रोजी विज पडून एका शेतकऱ्यांचा मृत्यू झाला या अवकाळी पावसामुळे शेतातील पिकाचे व फळपीक, भाजीपाला याचे नुकसान झाले असले तरी उन्हाळ्यातच दररोज पावसाळा सुरू असल्याने शेतकरी सध्या त्रस्त झाले आहेत.

तालुक्यात गेल्या कांही दिवसापासून पाऊस सुरू असून या पावसामुळे शेतातील रब्बी ज्वार, गहू, कांदा, पपई, टमॕटो, आंबा यासह आदी पिकाचे नुकसान या पावसामुळे झाले आहे. तर तालुक्यातील उस्तूरी, कासारबालकुंदा, कासारसिरसी, हासोरी या भागात गारपीट झाली आहे. त्यामुळे शेतीचे नुकसान झाले आहे. दिवसभर कडक उन्हाची तिव्रता सायंकाळच्या सुमारास पाऊस सुरू असल्याने शेतातील कामाचा खोळंबा होत आहे.

हा पाऊस ऊस पिकासाठी पोषक असल्याचे मानले जात असाले तरी कोरडवाहू शेतकऱ्यांचे मात्र नुकसान झाले आहे. शिवाय विजेचा कडकडाट मोठा सुरू राहत असून कांही ठिकाणी विजा पडून जनावरे दगावली आहेत यामुळे थोडाही पाऊस व वारा आला की, विजा पडतील म्हणून शेतकऱ्यांत भिती निर्माण झाली आहे.

फळपीकात आंबा पिकाचे मोठे नुकसान झाले आहे. शेवटी ज्वारी, गहू पेरणी करणाऱ्या शेतकऱ्यांची ज्वारी, गहू या पिकाचे नुकसान झाले आहे. सध्या अधूनमधून सुरू असलेल्या अवकाळी पावसामुळे शेतकरी मात्र त्रस्त आहेत.

बोरसुरी येथे वीज पडून तरुणाचा मृत्यू

निलंगा - निलंगा तालुक्यातील बोरसुरी गावातील अतिशय गरीब कुटुंबातील मजुराचा वीज पडून सोमवारी ता. २२ रोजी मृत्यू झाला आहे. बोरसुरी गावातील मुस्तफा शफीर पठाण, वय वर्ष 34, शेतावरून गावाकडे येत असताना अवकाळी पावसात 4:30 च्या सुमारास घराकडे येत असताना विज पडून मृत्यू झाला. हा तरूण गावातील तरुण, मजुरी करून खाणारा आहे. त्याच्या पश्चात वृद्ध आई-वडील, पत्नी, दोन लहान मुली असा परिवार आहे.