हिंगोली : हिंगोली (Hingoli) जिल्ह्यातील हिंगोली, वसमत व कळमनुरी येथील एसटी आगारातील कर्मचाऱ्यांचा २९ व्या दिवशीही संप (St Workers Strike) सुरुच आहे. प्रवाशांची होणारी गैरसोय पाहता शासनाने कर्मचाऱ्यांना कामावर येण्याच्या सूचना देऊन देखील आदेशाचे पालन केले नसल्याने विभागीय आगाराने जिल्ह्यातील तिन्ही आगारांतील ६२ कर्मचारी रविवारी (ता. २८) रात्री उशिरा निलंबित केले आहेत. दरम्यान रोजंदारीवरील दोन चालकांची सेवासमाप्ती केली असल्याचे एसटी महामंडळाच्या अधिकाऱ्यांनी सांगितले. आतापर्यंत जिल्ह्यातील तिन्ही आगारातून निलंबित केलेल्या कर्मचाऱ्यांची संख्या आता ९२ झाली आहे. एसटीच्या कर्मचाऱ्यांनी महामंडळाचे राज्य शासनात विलीन करण्यात यावे , या मागणीसाठी एक नोव्हेंबरपासुन लढा विलिनीकरणाचा सुरु केला आहे. याच महिन्यात सुरवातीला जिल्ह्यातील हिंगोली, वसमत (Vasmat) व कळमनुरी (Kalamnuri) या तीन आगारांतून विभागीय कार्यालयाच्या सूचनेनुसार प्रत्येकी दहा कर्मचारी निलंबित केले होते. तरीही जिल्ह्यातील कर्मचारी मागण्या मंजूर करण्याच्या निर्णयावर ठाम आहेत.

रविवारी रात्री उशिरा शासनाच्या आदेशानुसार विभागीय कार्यालयाने हिंगोली आगारातील यांत्रिकी विभागातील पाच, चालक बारा व वाहक तीन असे वीस वसमत आगारातील चालक अकरा, वाहक नऊ, तर कळमनुरी आगारातील चालक १५ आणि वाहक पाच असे एकूण ६२ कर्मचारी निलंबित केले. मात्र याला न जुमानता कर्मचारी मागण्या मान्य करण्याच्या निर्णयावर ठाम असुन संप सुरुच आहे.

शासनाने कर्मचाऱ्यांना संपात सहभागी न होता कामावर येण्याच्या सुचना दिल्या आहेत. मात्र कर्मचारी आपल्या मागणीवर ठाम आहेत. कामावर न येणाऱ्यावर विभागीय कार्यालयाने निलबंनाची कारवाई सुरू केली आहे.

- संजय पुंडगे, आगारप्रमुख