- प्रकाश लिमये

भाईंदर, ता.१६ (बातमीदार): इंग्रजी शब्दाचे स्पेलिंग वाचता येत नसल्यामुळे खासगी शिकवणी घेणार्‍या शिक्षिकेने सहा वर्षीय मुलाला छडीने अमानुष मारहाण केल्याची घटना भाईंदर येथे घडली आहे. पोलीसांनी शिक्षेकेविरुद्ध गुन्हा दाखल केला आहे.

भाईंदर पश्चिम येथील गणेश देवल नगर येथे रहाणार्‍या सहा वर्षीय मुलाचे इंग्रजी कच्चे असल्यामुळे पालकांनी त्याला खासगी शिकवणी लावली होती. ११ मे रोजी हा मुलगा शिकवणीला गेला असताना त्याला इंग्रजी शब्दाचे स्पेलिंग वाचता येत नसल्यामुळे शिक्षिकेने हाताने तसेच छडीच्या सहाय्याने पाठीवर, हातावर तसेच डोक्यावर अमानुष मारहाण केली.

ही गोष्ट मुलाने आपल्या आजीला सांगितली. मुलाच्या पाठीवर छडीचे वळ पाहून मुलाच्या आजीने भाईंदर पोलिस ठाण्यात धाव घेतली. पोलीसांनी शिक्षिकेवर गुन्हा केला आहे. याप्रकरणी शिक्षिकेला नोटीस बजावण्यात आली असून तीला चौकशीसाठी बोलाविण्यात आले आहे अशी माहिती भाईंदर पोलीस ठाण्याचे वरिष्ठ निरिक्षक एम. बी. पाटील यांनी दिली.