मुंबई: मुंबई महापालिका निवडणुकांचे पडघम आता वाजू लागले आहेत. अवघ्या काही महिन्यांवर असलेल्या निवडणुकांसाठी प्रत्येक पक्ष आपापल्या परीने रणनिती आखताना दिसत आहे. त्यातच काँग्रेसने मंगळवारी पालिका प्रशासन आणि सत्ताधारी शिवसेना यांच्यावर मोठ्या रकमेच्या घोटाळ्याचा आरोप केला. मुंबई महापालिका प्रशासनाने मालमत्ता करात ८०० कोटींचा गैरव्यवहार केला असून यास सत्ताधारी शिवसेनाच जबाबदार असल्याचं काँग्रेसने म्हटलं. "मालमत्ता कराच्या वसुलीबाबत पालिका प्रशासनाच्या अधिकाऱ्यांनी एकट्या वरळीत सुमारे १०० कोटी रुपयांचा घोटाळा केला आहे", असा आरोप विरोधी पक्षनेते रवी राजा यांनी केला. यावरून भाजपचे अतुल भातखळकर यांनी पर्यावरण मंत्री आदित्य ठाकरे यांना चांगलाच टोला लगावला.

मुख्यमंत्री उद्धव ठाकरे यांच्या पत्नी रश्मी यांना कोरोनाची लागण

"वरळी येथील मालमत्तेचे क्षेत्रफळ एकूण क्षेत्रफळाऐवजी केवळ दहा टक्क्यांपर्यंतच दाखवून कोट्यवधी रुपयांचा मालमत्ता कर वसुल करण्याच्या जागी केवळ लाखाचा मालमत्ता कर वसूल करण्यात आला आहे. हे पैसे पालिकेच्या तिजोरीत जमा होऊन मुंबईच्या विकासासाठी वापरले जाणे गरजेचे होते. मात्र, अधिकाऱ्यांनी स्वत:च्याच तिजोऱ्या भरल्या आहेत", असा आरोप काँग्रेसचे रवी राजा यांनी केला. वरळी विधानसभा मतदारसंघातून आदित्य ठाकरे हे आमदार म्हणून निवडून विधानसभेवर आले आहेत. त्यामुळे ही संधी साधत भाजपकडून आदित्य ठाकरेंवर टीका करण्यात आली. "आदित्य ठाकरेंच्या वरळी मतदारसंघात मालमत्ता कर वसुलीत १०० कोटींची तफावत असल्याचा काँग्रेसने 'घरचा आहेर' दिला. त्यामुळे तर पर्यावरण मंत्र्यांना कोविडची लागण झाली नाही ना?", असा टोला भातखळकर यांनी ट्वीटच्या माध्यमातून लगावला.

खळबळजनक! काँग्रेसचा शिवसेनेवर ८०० कोटींच्या घोटाळ्याचा आरोप

राज्याचे पर्यावरण मंत्री आणि मुख्यमंत्री उद्धव ठाकरे यांचे पुत्र आदित्य ठाकरे यांना २० मार्चला कोरोनाची लागण झाली. आदित्य ठाकरे यांनी स्वःत ट्विट करुन याची माहिती दिली. तसेच आपल्या संपर्कात जे लोक आले होते त्यांनी स्वतःची कोरोनाची चाचणी करुन घ्यावी असं आवाहनही त्यांनी केलं होतं. त्यातच काल काँग्रेसने मुंबई महापालिकेतील घोटाळ्याचा आरोप केला. त्यातही वरळीतील मालमत्ता कराचा उल्लेख करण्यात आल्याने या संबंधी भाजपच्या अतुल भातखळकरांनी थेट आदित्य ठाकरेंवर निशाणा साधला.