मुंबई : टॅटू काढून टाकण्यासाठी मुंबईत आलेल्या एका एअर होस्टसचा अपघातात दुर्दैवी मृत्यू झाल्याची माहिती समोर आली आहे. याप्रकरणी गाडी चालवत असलेल्या अध्वर्यू भांडेकर (२७) या मर्चंट नेव्हीच्या कर्मचाऱ्याविरुद्ध जुहू पोलिसांनी गुन्हा दाखल केला आहे. भांडेकर हा तरूण BMW कार चालवत असताना ही कार महापालिकेच्या डंपरला जाऊन धडकल्याची माहिती आहे.

अधिक माहितीनुसार, पल्लवी भट्टाचार्या (२९) असं मृत तरूणीचं नाव असून भांडेकर हा गाडी चालवत असताना ती त्याच्या शेजारी बसली होती. तर गाडीमध्ये अंकित खरे (३८) आणि भारती राय (२४) असे त्याचे दोन मित्रही बसलेले होते. यावेळी जुहू परिसरातून जात असताना त्यांची गाडी महापालिकेच्या उभ्या असलेल्या डंपरला मागून धडकली. यामध्ये पुढे बसलेल्या पल्लवीचा दुर्दैवी मृत्यू झाला असून भांडेकर आणि त्याचे दोन मित्र जखमी झाले आहेत.

दरम्यान, पल्लवी भट्टाचार्या ही कोलकत्ता येथील असून ती मागच्या काही दिवसांपासून दिल्लीत काम करत होती. ती एअर होस्टेस असून तिने तो जॉब सोडून दुसरी एअरलाईन जॉईन केली होती. यावेळी तिला कंपनीच्या नियमानुसार तिच्या शरीरावर असलेला टॅटू काढून टाकण्यास सांगण्यात आलं होतं.

त्यामुळे ती लेझर टॅटू रिमुव्हर या तंत्रज्ञानाने टॅटू काढण्यासाठी मुंबईत आली होती. तिची आणि भांडेकर याची पहिल्यापासून ओळख होती. त्यामुळे तिने भांडेकर याच्याकडे राहण्याचा निर्णय घेतला होता.

साकीनाका येथे पार्टी करून अंधेरी येथील घरी परतत असताना भांडेकर याचे गाडीवरील नियंत्रण सुटल्याचं प्रत्यक्षदर्शींनी सांगितलं आहे. या अपघातानंतर पल्लवी हिच्या कुटुंबियांनी भांडेकर याच्याविरोधात तक्रार दाखल केली असून पोलिसांनी भांडेकर याच्याविरोधात गुन्हा दाखल केला आहे. तसेच पुढील तपास सुरू असल्याचं पोलिसांनी सांगितलं आहे.