Accident News: पावणे एमआयडीसीतून तुर्भे नाका येथे जाणाऱ्या तरुणांची दुचाकी स्लिप झाल्याने दुचाकीच्या पाठीमागे बसलेला तरुण पाठीमागून येणाऱ्या टैंकरखाली सापडून जागीच ठार झाला.

ही घटना सोमवारी (ता. ६) सकाळी तुर्भे नाका येथील फायझर रोडवर घडली. अपघातानंतर टँकरचालक फरारी झाला आहे.

या अपघातात मृत झालेल्या तरुणाचे नाव राहुलकुमार राजकुमार रॉय (वय १८) असून तो पावणे एमआयडीसीमध्ये राहत होता. सोमवारी सकाळी अकरा वाजण्याच्या सुमारास राहुलकुमार व त्याचा सहकारी ऋषी कुमार महातो (वय १९) हे दोघे दुचाकीवरून एमआयडीसीतून तुर्भे नाका येथे जात होते.

या वेळी त्यांची दुचाकी फायझर रोडवर मच्छी मार्केटजवळ स्लिप झाली. त्या वेळी दोघेही खाली पडले. त्या वेळी पाठीमागून भरधाव येणाऱ्या टैंकरखाली राहुलकुमार सापडल्याने तो जागीच ठार झाला.