मुंबई- केंद्रीय गृहमंत्री अमित शाह आज मुंबई दौऱ्यावर आहेत. यावेळी त्यांनी सर्वप्रथम भाजप नेते आशिष शेलार यांच्या सार्वजनिक गणपतीचे दर्शन घेतले. त्यानंतर ते लालबागच्या राजाच्या चरणी लीन झाल्याचे पाहायला मिळाले. अमित शाह देवेंद्र फडणवीस यांच्या सागर बंगल्यावर गेले. याठिकाणी त्यांनी मुख्यमंत्री शिंदे आणि उपमुख्यमंत्री देवेंद्र फडणवीस यांच्याशी बंद दाराआड चर्चा केल्याचे समजते.

महाराष्ट्रात सध्या आमदार अपात्रतेचा मुद्दा गाजत आहे. विधानसभा अध्यक्ष राहुल नार्वेकर यांनी आमदार अपात्रता प्रकरणी सोमवारी सुनावणी घेण्याचा निर्णय घेतला आहे. त्यामुळे यापार्श्वभूमीवर अमित शाह यांनी मुख्यमंत्री आणि उपमुख्यमंत्री यांच्याशी चर्चा केली असल्याचं बोललं जातंय.

सुप्रीम कोर्टाने आमदार अपात्रता प्रकरणावर सुनावणी करताना विधानसभा अध्यक्ष राहुल नार्वेकर यांना फटकारलं होतं. त्यांनी अधिक वेळ न लावण्याच्या सुचना केल्या होत्या. त्यानंतर नार्वेकर यांनी दिल्लीमध्ये जाऊन तुषार मेहता यांची भेट घेतली होती. तसेच इतर कायदा तज्ज्ञांशी चर्चा केली होती. त्यानंतर त्यांनी २५ सप्टेंबर रोजी सुनावणी घेण्याचा निर्णय घेतलाय.

शिवसेनेच्या दोन्ही गटांचे प्रमुख उद्धव ठाकरे आणि एकनाथ शिंदे हे सुनावणीवेळी समोरासमोर येण्याची शक्यता व्यक्त केली जात आहे. नार्वेकरांकडून तसे संकेत मिळाले आहेत. त्यामुळे या दिवसाकडे सगळ्यांचे लक्ष असणार आहे. यासंबंधी निर्णय घेतला जातो की आणखी वेळ लागतो हे सोमवारी कळेल. (Latest Marathi News)