महिलेच्या गळ्यातील ६५ हजारांचे दागिने लांबवल्याची घटना घणसोली येथे घडली. यात महिलेच्या गळ्याला जखम झाली आहे. याप्रकरणी गुन्हा दाखल करण्यात आला असून तपास सुरू आहे.

कोपरखैरणे येथील रहिवासी मालन विष्णु जरे या घणसोलीत एका घरी मुलांची देखभाल करण्याचे काम करतात. सोमवारी (ता.११) त्या नेहमीप्रमाणे कामावर गेल्या होत्या. रात्री ९ः३० वाजता काम संपल्यावर त्या आपल्या मुलीच्या घरी जाण्यासाठी निघाल्या होत्या. तेव्हा पाठीमागून आलेल्या दुचाकीवरुन आलेल्या लुटारुंनी त्यांच्या पाठीवर जोरात थाप मारली. त्यानंतर त्यांच्या गळ्यातील लक्ष्मीहार आणि सोन्याच्या दोन माळा जबरदस्तीने खेचल्या.

यावेळी मालन यांनी प्रतिकार करण्याचा प्रयत्न केला असता दुचाकीवरील पाठीमागे बसलेल्याने त्यांच्या मानेवर जोरात फटका मारला. दागिने घेऊन चोरांनी घणसोली बस डेपोच्या दिशेने पलायन केले. मालन यांनी आरडाओरडा केला, पण कुणीही मदतीसाठी आले नाही. त्यानंतर त्यांनी रबाळे पोलिस ठाण्यात जाऊन तक्रार दाखल केली.