मुंबई : ग्रेटर नोयडामध्ये वाहन मेळावा सुरू होण्यास अवघा एक दिवस उरला आहे. वाहनप्रेमी आणि कंपन्या दोन वर्षांपासून या मेळाव्याची प्रतीक्षा करतात. या प्रदर्शनामध्ये चीनसह जगभरातील अनेक नामांकित वाहन कंपन्यांचे ब्रॅण्ड सहभागी होत आहेत. मात्र चीनमधून आलेल्या कोरोना व्हायरसमुळे येथे भेट देणाऱ्या प्रेक्षकांची संख्या यंदा रोडावण्याची शक्‍यता आहे.

चीनच्या कंपन्या भारतात दाखल होत असल्याने ही भीती अधिक वाढली आहे. चीनच्या एका कंपनीचा भारत-प्रवेश यामुळे लांबला आहे. मात्र विदेशातून भारतात येणाऱ्या प्रत्येक प्रवाशाची कसून आरोग्य तपासणी करण्यात येत असल्याने कोरोनाचा धोका नसल्याचे सांगण्यात येत आहे. 

हेही महत्वाचे...या पोराने गुगललाच गंडवले 
 

2018 च्या वाहन मेळाव्यात लोकप्रिय चिनी वाहन ब्रॅण्ड एमजी मोटर्सने भारतीय बाजारपेठेत प्रवेश केला आहे. एमजीला मोठे यश मिळत असल्याने ग्रेट वॉल मोटर्ससारखे अन्य लोकप्रिय ब्रॅण्ड भारतीय बाजारपेठेत पाहिले पाउल टाकण्याच्या प्रयत्नात आहेत. मात्र कोरोना व्हायरसचा वाढता धोका लक्षात घेता त्यांच्या सहभागावर प्रश्‍नचिन्ह उपस्थित झाले आहे.

ग्रेट वॉल मोटर्स सहभागी झालीच, तर तिला किती प्रतिसाद मिळतो, हे पाहणे औत्सुक्‍याचे ठरणार आहे. कोरोना व्हायरस यापूर्वीच 27 पेक्षा अधिक देशांत पसरला असून, यात 360 पेक्षा अधिक जणांचा बळी गेला आहे. 
ग्रेट वॉल मोटर्सने एक अधिकृत निवेदन जारी करत या वाहन मेळाव्यात सहभागी होणार नसल्याचे कळवले आहे.

तथापि, कंपनीचे प्रतिनिधी यापूर्वीच भारतात आले असून, तेही वाहन मेळाव्यात दाखल होणार नाहीत. सावधगिरीचा उपाय म्हणून हा निर्णय घेण्यात आल्याचे कंपनीने निवेदनात म्हटले आहे. 

हेही महत्वाचे...नगरसेवकांना "ही' सुविधा हवीच... 

कोरोना व्हायरसचे तीन रुग्ण केरळमध्ये सापडले असून, चीनमध्ये प्रवासासाठी जाऊ नये, असे मंत्रालयाने स्पष्ट केले आहे. चीनमधून आलेल्या प्रवाशांची कठोर तपासणी करण्यात येत असल्याचे मंत्रालयाने म्हटले आहे.