मुंबई : भारत बायोटेकनिर्मित "कोव्हॅक्‍सिन' या स्वदेशी लशीची चाचणी लवकरच सायन येथील पालिकेच्या लोकमान्य टिळक रुग्णालयात सुरू होणार आहेत. भारतीय वैद्यकीय संशोधन परिषदेने (आयसीएमआर) या चाचणीस मान्यता दिली असून, रुग्णालयातील नैतिक समितीच्या अंतिम मंजुरीची या प्रस्तावासाठी प्रतीक्षा आहे. अधिकाऱ्यांच्या म्हणण्यानुसार, 18 ते 60 वर्षे वयोगटातील एक हजार सहभागींसह ही तिसरी वैद्यकीय चाचणी होईल.

BMC बॉऊन्सर नियुक्तीचा वाद आता थेट मुख्यमंत्र्यांच्या दरबारी

भारत बायोटेकच्या अधिकृत संकेतस्थळानुसार, ही लस बीएसएल- 3 (बायो-सेफ्टी लेव्हल) उच्च सामग्री सुविधेनुसार विकसित करण्यात आली आहे. जुलैपासून संपूर्ण देशभर सुरू झालेल्या टप्प्यातील प्रथम आणि द्वितीय मानवी वैद्यकीय चाचण्यांसाठी भारताच्या औषध नियंत्रकांची (डीसीजीआय) लसीसाठी मंजुरी मिळाली आहे. सायन रुग्णालयाचे फुप्फुसीय औषध विभागाचे प्रमुख डॉ. एन. टी. आव्हाड यांनी सांगितले की, कोरोनासाठी अनेक लसी चाचणीच्या आधारावर वापरल्या जात आहेत. भारत बायोटेकने भारतीय वैद्यकीय संशोधन परिषद (आयसीएमआर) व राष्ट्रीय विषाणुशास्त्र संस्थेच्या (एनआयव्ही) सहकार्याने तयार केलेल्या स्वदेशी लसीच्या चाचणीसाठी सायन रुग्णालयाची निवड केली आहे. दरम्यान, केईएम आणि नायर रुग्णालयांनी आता ऑक्‍सफोर्ड कोव्हिड -19 लशीचा दुसरा डोस स्वयंसेवकांना देण्यास सुरुवात केली आहे. ऑक्‍सफोर्ड कोव्हिड 19 लस तयार करण्यासाठी ऍस्ट्रॅजेनेकाबरोबर भागीदारी करणारी पुणे येथील सीरम इन्स्टिट्यूट ऑफ इंडियादेखील मानवी वैद्यकीय चाचण्यांचे टप्प्याटप्प्याने आयोजन करत आहे. 

कोरोनाबाधितांना होऊ शकतो फटाक्यांच्या धुराचा त्रास, ज्येष्ठ नागरिकांची काळजी घेणे गरजेचे

कोवॅक्‍सिनच्या तिसऱ्या टप्प्यातील वैद्यकीय चाचण्यांसाठी निवड झाली. सध्या कागदपत्राची पूर्तता करत आहोत, नैतिक समितीच्या मान्यतेची वाट पाहत आहोत. एक हजार स्वयंसेवकांची निवड करण्यात येईल. त्यातील 20 टक्के लोकांना सहव्याधी असतील. पाच टक्के लोक वैद्यकीय कोव्हिडयोद्धा असतील. ही चाचणी दोन टप्प्यात पुढे जाईल. दुसरा डोस पहिल्या 28 दिवसांनंतर दिला जाईल. 
- डॉ. एन. टी. आव्हाड, प्रमुख, फुप्फुसीय औषध विभाग, सायन रुग्णालय. 

अनलॉक सुरू होताच सोनसाखळी चोरही सक्रिय; मुंबईत एका दिवसात 8 घटना उघडकीस

सायन रुग्णालयात लवकरच ही वैद्यकीय चाचणी सुरू होणार आहे. भारत बायोटेक या स्वदेशी कंपनीची ही लस असून, लवकरच वैद्यकीय चाचणी केली जाईल. 
- डॉ. मोहन जोशी, अधिष्ठाता, सायन रुग्णालय 

----------------------------------------
(संपादन : गोरक्षनाथ ठाकरे)