डोंबिवली - कल्याण पूर्वेतील गोळवली परिसरात कौटुंबिक वादातून झालेल्या भांडणातून एक धक्कादायक घटना घडली आहे. तिघांनी मिळून एका तरुणाचे धारदार ब्लेडने गुप्तांग छाटत त्याला ठार मारण्याचा प्रयत्न केला आहे. याप्रकरणी मानपाडा पोलिस ठाण्यात सोनुकुमार राम (वय 32), करण राम (वय 28) आणि सुरेंद्रकुमार राम (वय 35) यांच्या विरोधात गुन्हा दाखल करण्यात आला आहे. जखमी संजयकुमार राम (वय 39) याच्यावर मुंबईतील जे.जे.रुग्णालयात उपचार सुरु आहेत. तिघाही संशयितांना पोलिसांनी ताब्यात घेतले असून अधिक तपास सुरु आहे.

डोंबिवली एमआयडीसी परिसरातील एका कंपनीत काम करणारे हे चौघे ही कामगार गोळवली येथील शंकर शेठ चाळीमध्ये गेल्या अनेक महिन्यांपासून राहण्यास होते. सोनुकुमार व संजयकुमार यांच्या कौटुंबिक वाद होते. या वादातून संजय कुमार याचा काटा काढण्याचा विचार सोनू कुमार याच्या डोक्यात होता. मंगळवारी रात्री त्यांनी घरी मेजवानीचा बेत आखला. या दरम्यान सर्वांनी एकत्रित जेवण करत नंतर मद्यपान केले. 12 वाजेपर्यत मद्यपान केल्यानंतर सोनू कुमार व सुरेंद्र कुमार यांच्यात वाद झाला. या वादाचे रुपांतर पुढे हाणामारीत झाले.

सोनु, करण व सुरेंद्र कुमार या तिघांनी संजयकुमार ला मारहाण केली. त्यानंतर सोनू कुमार ने धारदार ब्लेडने संजय कुमार याचे गुप्तांग कापले. संजय कुमार याच्या शरीरातून खूप रक्तस्त्राव झाल्याने आरोपींनी त्याला शिवम रुग्णालयात उपचारासाठी दाखल केले. तेथे प्राथमिक उपचार केल्यानंतर त्याला पुढील उपचारासाठी मुंबई तील जे. जे. रुग्णालयात दाखल केले. संजयकुमार याच्या तक्रारीवरुन मानपाडा पोलिस ठाण्यात तिघांविरोधात गुन्हा दाखल करण्यात आला असून पोलिसांनी तिघांनाही ताब्यात घेतले आहे. याचा अधिक तपास सुरु असल्याची माहिती वरिष्ठ पोलिस निरिक्षक शेखर बागडे यांनी दिली.