नालासोपारा - विरारमध्ये (Virar) एक धक्कादायक घटना उघड झाली आहे. कोरोनाच्या (Corona) भीतीने 72 वर्षीय व्यक्तीचा 3 दिवस मृतदेह कुटुंबीयांनी घरातच ठेवला होता. तर 40 वर्षीय मुलीनेही विरार नवबपूर समुद्रात जाऊन आत्महत्या (Suicide) केली होती. बुधवारी सकाळी तिच्या दुसरी बहीण ही अर्नाळा समुद्रात जाऊन आत्महत्या करण्याचा प्रयत्न करत असताना स्थानिक नागरिकांच्या सतर्कतेमुळे तिला वाचविण्यात आले आहे. वाचलेल्या तरुणीच्या जवाबावरून हा सर्व धक्कादायक प्रकार उघड झाला आहे. ही सर्व घटना कोरोनाची भीती, आर्थिक विवंचना, आणि कौटुंबिक वादातून घडली असल्याचा प्राथमिक अंदाज पोलिसांनी वर्तविला आहे. (Mumbai Latest News)

विरार पश्चिम ग्लोबल सिटी परिसरातील अग्रवाल ब्रूक्लीन पार्क या इमारतीत आई- वडील आणि दोन मुली असे 4 जणांचे कुटुंब राहत होते. मयत हरिदास साहकार (वय 72) , 65 वर्षांची आई, विद्या हरिदास साहकार (वय 40), स्वप्नल हरिदास साहकार (वय 36) असे कुटुंबात राहणाऱ्या व्यक्तींची नाव आहेत. वडील हरिदास हे रेशनिग डिपार्टमेंट मधून निवृत्त झाले होते. निवृत्तीच्या पेन्शन वर यांचे सर्व कुटुंबाचा उदरनिर्वाह चालत होता. मागच्या 8 दिवसापूर्वीच विरार पश्चिम ग्लोबल सिटी मधील ब्रूक्लीन पार्क या इमारतीच्या दुस-या मजल्यावर भाड्याने राहण्यासाठी आले असल्याची माहिती स्थानिक रहिवाशी प्रमोद सामंत आणि इस्टेट एजंट हरिकेशन मिश्रा यांनी दिली आहे.

1 ऑगस्ट रोजी वडील हरिदास यांचे राहत्या घरात अचानक निधन झाले होते. या निधनानंतर वडिलांना कोरोना झाला असावा आणि हे जर आपण बाहेर कुणाला सांगितले तर आपणालाही कोरन टाईन करतील या भीतीने 1 ऑगस्ट पासून वडिलांचा मृतदेह राहत्या घरातील बेडवरच ठेवण्यात आला होता. इमारती मधील राहिवाशाना याचा वास येत होता. रहिवाशांनी सेक्युरिटी सभासदांना सांगितले होते. परंतु हा वास कुटून येतोय हे कळत नव्हते. पण आज पोलिसांनी दुसऱ्या मजल्यावर जाऊन सर्व तपासणी केली असता हा सर्व प्रकार उघड झाला आहे. घटनास्थळावर मृतदेहाचा वास येऊ नये म्हणून मृतदेहाच्या शेजारी, डाम्बर गोळी, कापूर, अगरबत्ती लावून सर्व कुटुंब हे घरातच मृतदेहा शेजारी राहत असल्याचेही समोर आले आहे.

मंगळवारी याच कुटुंबातील 40 वर्षाच्या विद्या साहकार या तरुणीचा मृतदेह हा विरारच्या नवबापूर समुद्र किनाऱ्यावर सापडला होता. याबाबत अकस्मात मृत्यूची नोंद करून तपास सुरू केला असता बुधवारी सकाळी दुसरी मुलगी स्वप्नल हीही आत्महत्या करण्यासाठी अर्नाळा समुद्र किनार्यावर आली होती. तिला पोलीस आणि स्थानिक नागरिकांनी वाचविले आहे. वाचलेल्या मुलीच्या जवाबावरून कळले की मंगळवारी सापडलेला मृतदेह हा तिच्या बहिणीचा होता तर वडिलांचे निधन राहत्या घरात झाले आहे. 65 वर्षांची आई सोबत आहे. त्यावरून आम्ही घटनास्थळाचा पंचनामा करून मृतदेह ताब्यात घेतला आहे. याचा अधिक तपास करीत आहोत असे अर्नाळा चे वरीष्ठ पोलीस निरीक्षक राजू माने यांनी सांगितले आहे.