Mumbai Ganpati Festival : गणेशोत्सव मंडळे व शाडूच्या मातीच्या मूर्ती तयार करणाऱ्या मूर्तिकारांसाठीच्या परवानग्या पाच वर्षांसाठी वैध राहणार आहेत. त्यामुळे मंडळांना आता दरवर्षी परवानगी घेण्याची गरज नाही. तसे निर्देश पालक मंत्री दीपक केसरकर यांनी यंत्रणांना दिले आहेत. मुंबईकरांसाठी गणेशोत्सव कालावधीत भाविकांना पिण्याचे पाणी, निर्माल्य, पार्किंग, बस आणि रेल्वे सेवा तसेच शौचालयाची सुविधा पुरविण्याबाबत आज झालेल्या बैठकीत प्रशासनाला निर्देश देण्यात आले.

मुंबई महापालिकेच्या ‘एफ दक्षिण’ विभागाच्या सभागृहात झालेल्या बैठकीला मुंबई पोलिस, रेल्वे, बेस्ट, रेल्वे सुरक्षा बल इत्यादींसारख्या विविध प्राधिकरणांचे प्रतिनिधी उपस्थित होते. मुंबई पालिकेच्या अधिकारी वर्गाचीही बैठकीला उपस्थिती होती. गणेशोत्सव मंडळांना यापुढे मंडप परवानगीचा अर्ज दरवर्षी ऑनलाईन करावा लागणार नाही.

एकदा ऑनलाईन घेतलेली परवानगी पाच वर्षांसाठी वैध ठरेल. ज्यामुळे मूर्तिकारांना प्रत्येक वर्षी परवानगी घ्यावी लागणार नाही. ही परवानगीही पाच वर्षांसाठी वैध राहील. पुढील वर्षी एप्रिलमध्ये मूर्तिकारांना शाडूची माती उपलब्ध करून देण्यात येईल, असे पालिका प्रशासनाच्या वतीने स्पष्ट करण्यात आले.

विनामूल्य पार्किंग

बृहन्मुंबई गणेशोत्सव समन्वय समितीने याआधीच्या बैठकीत मांडलेल्या विविध ५२ मुद्द्यांवर करण्यात आलेल्या उपाययोजनांची माहिती उपआयुक्त रमाकांत बिरादार यांनी दिली. त्याअंतर्गत प्रामुख्याने यंदाच्या गणेशोत्सवासाठी विसर्जन स्थळाच्या नजीकच्या भागातील सार्वजनिक वाहनतळावर विसर्जन दिवशी २४ तास विनामूल्य सेवा उपलब्ध करून देण्यात येईल. प्रमुख विसर्जन स्थळी भाविकांना पाण्याच्या बाटल्या पुरविण्यात येतील. भाविक व गणेशोत्सव मंडळांच्या निर्माल्यांच्या व्यवस्थेसाठी घनकचरा व्यवस्थापन विभाग सुसज्ज व तयार आहे. विसर्जन परिसरातल्या शौचालयाची सुविधा विनामूल्य उपलब्ध करून देण्यात येणार आहे.

रात्रभर बेस्ट सेवा गणेशोत्सव काळात मुंबईत फिरणाऱ्या नागरिकांची गैरसोय होऊ नये म्हणून बेस्ट आणि रेल्वेने रात्रभर सेवा उपलब्ध करून द्यावी, अशाही सूचना दीपक केसरकर यांनी रेल्वे विभागाला बैठकीदरम्यान केल्या. विसर्जन स्थळाच्या परिसरात पुरवण्यात येणाऱ्या सुविधांचे फलक लावून जनजागृती करा. विसर्जन मिरवणूक मार्गावर चिन्हे आणि दिशादर्शक फलक व खुणांचा वापर करा, अशा सूचनाही त्यांनी पोलिस आणि महापालिका प्रशासनाला केल्या.