मुंबई : केनियामध्ये (kenya) होत असलेल्या कटलास एक्सप्रेस या बहुराष्ट्रीय सागरी कवायतींसाठी गेलेल्या भारतीय नौदलाच्या (Indian navy) मार्कोस कमांडोंनी आफ्रिकी देशांच्या (African countries) तसेच जॉर्जियाच्या नौसैनिकांना अतिरेकीविरोधी कारवायांचे विशेष प्रशिक्षण (Special training) दिले. ( Indian Navy commandos gives special training African navy-nss91)

नौदलाचे मार्कोस हे कमांडो अतिरेकीविरोधी कारवायांमध्ये निष्णात आहेत. कौशल्य, ताकद, कार्यक्षमता याबाबत अमेरिकेचे सील कमांडो सर्वश्रेष्ठ मानले जातात, पण मार्कोस कमांडोदेखील त्यांच्या तोडीसतोड आहेत. उरण येथे मुख्य तळ असलेल्या मार्कोस कमांडो पथकाने 2008 मधील कसाब च्या अतिरेकी हल्ला निष्प्रभ करण्यासाठी सेनादलाचे विशेष कमांडो येईपर्यंत महत्वाची कामगिरी बजावली होती. सध्या हे कमांडो आयएनएस तलवार या भारतीय युद्धनौकेसह कटलास एक्सप्रेस कवायतींमध्ये सहभागी झाले आहेत. त्यांनी मोंबासा बंदरात केनिया, जिबौती, मोझांबिक, कॅमेरून आणि जॉर्जियाच्या तटरक्षक दलाच्या जवानांना प्रशिक्षण दिले. अतिरेक्यांच्या ठिकाणांवर प्रवेश करणे, अतिरेक्यांचा शोध घेणे, त्यांची साधनसामुग्री शोधून ती ताब्यात घेणे आदी प्रशिक्षण त्यांनी दिले.