ठाणे : तुमचे चोरीला गेलेले दागिने मिळाले असून कल्याण लोहमार्ग पोलिस ठाण्यात येऊन ते घेऊन जा, असा दूरध्वनी दिवा येथे राहणाऱ्या संदीप घाग यांना आला आणि त्यांना सुखद धक्काच बसला. लॉकडाऊनदरम्यान नोकरी गेल्याने आर्थिक संकटात सापडलेल्या घाग यांनी आनंद व्यक्त केला असून लोहमार्ग पोलिसांचे आभार मानले आहेत. 

BMCकडून शिक्षकांच्या बोनसमध्ये भेदभाव; अनुदानित शाळेतील शिक्षकांना 50 टक्के सानुग्रह अनुदान

दिवा येथे राहणारे संदीप घाग 2012 मध्ये काही कामानिमित्त कल्याणला आले होते. तेव्हा चोरट्यांनी त्यांच्याकडील 70 हजार रुपये किमतीचे दागिने चोरून पळ काढला होता. लोहमार्ग पोलिसांनी चोरट्यांना अटक केली आणि त्यांच्याकडून मुद्देमाल जप्त केला होता. तपासाची न्यायालयीन प्रक्रिया पूर्ण झाल्यानंतर संदीप यांना ते दागिने परत करण्यात आले.

राज्य पोलिस कोरोनामुक्तीच्या दिशेने? बाधित पोलिसांची संख्या घटली

कल्याण लोहमार्ग पोलिस ठाण्याचे वरिष्ठ पोलिस निरीक्षक वाल्मिक शार्दुल यांनी संदीप यांना दागिने लवकरात लवकर देण्यात यावेत, अशी सूचना पोलिस अधिकारी रवींद्र आव्हाड यांना केली होती. त्यानुसार लोहमार्ग पोलिसांनी संदीप यांचा पत्ता शोधून त्यांच्याशी दूरध्वनीवर संपर्क साधून दागिने घेऊन जाण्याबाबत कळवले. त्यानुसार रविवारी आपल्या वडिलांसह लोहमार्ग पोलिस ठाण्यात जाऊन संदीप यांनी दागिने स्वीकारले. 
-----------------------------------------------

( संपादन - तुषार सोनवणे )