Mumbai Rain: मुंबईसह परिसरात काल रात्रीपासून पावसाला सुरुवात झाली आहे. आज सकाळी देखील पावसाची रिपरिप कायम आहे. हवामान विभागाच्या अंदाजानुसार पावसाचा जोर वाढणार आहे. पावसामुळे मुंबईकरांचे हाल होत आहेत. अनेक ठिकाणी पाणी साचण्यास सुरुवात झाली आहे. त्यामुळे पुन्हा एकदा मुंबईकरांना मनस्ताप सहन करावा लागत आहेत.

लोकल सेवेकर काय झाला परिणाम?

पावसाचा लोकल सेवेवर सुद्धा परिणाम झाला आहे. तिन्ही मार्गावरील लोकल उशिराने धावत आहेत. मध्य रेल्वे १० ते १४ मिनिटे उशिराने धावत आहे. हार्बर रेल्वे १५ मिनिटे, तर पश्चिम रेल्वे १० मिनिटे उशिराने धावत आहे. त्यामुळे चाकरमान्यांना त्रास सहन करावा लागत आहेत. त्यामुळे लोकलचं वेळापत्रक पाहूनच बाहेर पडण्याचे आवाहन लोकांना करण्यात येत आहे.

अंधेरी सबवे पाणीखाली गेला आहे. त्यामुळे सब-वेवरील वाहतूक बंद करण्यात आली आहे. बांद्रा, खार, सांताक्रूझ, कांदेवरी-बोरिवली, अंधेरी, गौरेगाव, मालाड, जोगेश्वर या ठिकाणच्या सखल भागात पाणी साचले आहे. पहाटेपासून पाऊस सुरु असल्याने १ ते २ फूट पाणी साचले आहे.

मुंबईत हिंदमाता परिसरात पाणी साचलं आहे. पालिकेकडून नालेसफाईचा दावा प्रत्येकवेळी करण्यात येतो. पण, त्यांचा दावा फोल ठरल्याचं डोळ्यासमोर आहे. पाणी साचले असल्याने वाहन चालकांना पाण्यातून वाट काढावी लागत आहे. ट्रॅफिक पोलीस याठिकाणी उपस्थित असून दुर्घटना घडू नये यासाठी ते खबरदारी घेत आहेत.